ammanerulersitsinissaq
Demokraatit: Akileraarutit sumut atorneqartarnersut paasisinnaasariaqarpaat
Inatsisartut aamma Inatsisartut allaffeqarfiani aningaasartuutit tamanit takuneqarsinnaanngornissaat kiisalu kialluunniit paasiniaasinnaanngornissaa anguniarlugu partii suli sulissuteqarpoq. Aalajangiiffigisassatut siunnersuut marlunngorpat saqqummiunneqassaaq
Naalakkersuisooqataasut Demokraatit Inatsisartuni aalajangiiffigisassatut siunnersuunni saqqummiussavaa marlunngornermi. Siunnersuutigineqarpoq 'Inatsisartut aamma Inatsisartut allaffeqarfiani aningaasartuutit tamanit takuneqarsinnaanngornissaat kiisalu kialluunniit paasiniaasinnaanngornissaa anguniarlugu Inatsisartut Suleriaasiata allanngortinnissaanut Inatsisartut Siulittaasoqarfia saqqummiusseqqullugu peqquneqarnissaanik Inatsisartut aalajangiiffigisassaattut siunnersuut'.
Demokraatit siunnersuutigaat pisortat aningaasaataanik atuineq tamanit takuneqarsinnaasariaqartoq.
- Kialluunniit takusinnaasariaqarpaa Namminersorlutik Oqartussat kommunillu Inatsisartut (taamaasillutillu innuttaasut) akuersissutaannik aningaasanik qanoq aqutsinersut. Isumaqaratta demokratiskiusumik ingerlatsivimmi inuiaqatigiinni innuttaasut tamanna pisinnaatitaaffigisariaqaraa. Aamma isumaqaratta taamatut isiornikkut aningaasanik akisussaassuseqartumik aqutsinissaq siuarsarneqarsinnaasoq, Demokraatit nassuiaapput.
Ammasumik takuneqarsinnaanissaat
Aalajangiiffigisassatut siunnersuut Demokraatinit Inatsisartuni ilaasortaq Randi Vestergaard Evaldsen saqqummiissaaq.
- Inatsisartut Siulittaasoqarfia allattugaatinik takujumalluni qinnuteqaatinut atatillugu aningaasartuutit ilanngussartaannik tunniussisinnaavoq inatsisinik tunngaveqanngikkaluarluni - tassa imaappoq, atuuttunik malittarisassaqanngikkaluartoq Inatsisartut Siulittaasoqarfiata akuersinissaanut pisussaatitsisunik. Demokraatini nalunngilarput, Inatsisartut Siulittaasoqarfiat arlaleriarluni akuersisarsimasoq - tunngaviusumilli Inatsisartut Siulittaasoqarfiat pisussaaffeqanngilaq Inatsisartuneersunik imaluunniit Inatsisartut allaffeqarfianeersunik aningaasartuutit ilanngussartaannik tunniussissalluni allattugaatinik takujumalluni qinnuteqartunut.
'Kikkut tamarmik pisortat atuinerannut paasiniaasinnaatitaasariaqartut aamma Inatsisartut kiisalu Inatsisartut Allaffeqarfiata atorsimasaat pineqartillugit' Randi Vestergaard Evaldsen oqarpoq.
Siunnersuut siullermeerlugu ullumi marlunngornermi oqallisigineqassaaq. Maajip 19-ani aappassaa oqallisigineqassaaq.