angusaloqattaarneq
David Moyes Unitedimit soraarsitaavoq
David Moyes Manchester Unitedimi sungiusaasuujunnaarpoq, tamanna marlunngornermi nalunaarutigineqarpoq
Manchester Unitedip nittartakkamini nalunaarutigaa sungiusaasortik Skotlandimeersoq David Moyes soraarsitaasoq.
Ukioq kingulleq Tuluit Nunaanni Premier Leaguemi pissartanngortut maannakkut pakatsissutigineqartumik arfineq aappaattuinnaq inissisimapput.
Tusagassiuutinut nalunaarummi naatsumik allanneqarpoq David Moyes suliaanut qujaniartoqarluni. Ataasinngornerup ingerlanerani tuluit tusagassiorfiini arlaqartuni allaaserineqarpoq 50-inik ukiulik soraarsitaangajalersoq, tamannalu marlunngornermi piviusunngorpoq.
David Moyes tallimanngorpat 51-liisussaq ukiuni arfinilinni Unitedimut isumaqatigiissuteqaraluarpoq.
Moyesip Manchester Unitedip sungiusaasutut unamminera kingulleq sapaatiummat pivoq, tassani kingullermik sungiusaasuuffia Everton Unitedip unammimmagu. Everton 2-0-limik ajugaavoq.
Manchester Unitedip pikkorinnerit sisamat tikissinnaajunnaareerpaat, aappaagumullu Champions Leaguemut anngussinnaajunnaareerlutik.
Hollandip nunanut allanut sungiusaasuat Louis Van Gaal aasareerpat Manchesterip aappaluttortaani sungiusaasunngussasoq ilimagineqarpoq. Aasaru VM-eqareerpat Hollandimut sungiusaasuujunnaassaaq.
Ryan Giggs unamminerni kingullerni sungiusaasuussasoq ilimagineqarpoq.