Danskit universitetii uuliamik ujaarlernissaannut uuliasioqatigiiffinnit akilerneqartarput

Exxon Mobile, BP, Shell, Chevron, Total aamma Mærsk.

Uuliamik gassimillu qanoq pitsaanerutigisumik qaloorisoqarsinnaanersoq misissorneqarniassammat uuliasioqatigiiffiit danskit universitetiinut aningaasaliisarput. Tamanna ilisimatuunit annertuumik isornartorsiorneqarpoq, Videnskab.dk allappoq.

- Uuliasiorfiusinnaasunik ujaasiniarneq isumaqanngilluinnartutut isigaarput. Silaannaap innimigineqarnissaa pillugu tamanna nalunngilarput. Iliuuserineqartoq akuerineqarsinnaanngilaq, Aalborg Universitetimi Københavnimiittumi p.hd.-nngorniarluni ilinniagaqartoq Emil Urhammer oqarpoq. Piujuaannartitsinissaq aallaavigalugu allanngortitsinermut ilinniagaqartuuvoq.

Universitetit aningaasalerneqartarnerat pillugu Videnskab.dk pappiliaatinik paasissutissanik qinnuteqarnermini takusinnaavaa danskit universitetii 2009-p 2014-llu akornanni uuliasioqatigiiffinnit 275 millioninik aningaasaliiffigineqarsimasut.

Aningaasat amerlanerpaartaat misissuinernut atorneqarput. Tassani uuliamik gassimillu qanoq pitsaanerutigisumik qaloorisoqarsinnaanermut misissuinernut atorneqartarput.

Professori: Taamatut misissuisoqartarunnaartariaqarpoq
Danmarks Tekniske Universitetimi 'Center for Olie og Gas' assinganik anguniagaqartuuvoq. Ukiuni tulliuttuni qulini uuliasiornissamut periarfissat misissorneqarnissaat pillugit 1 milliard koruuninik uuliasioqatigiiffinnit aningaasalerneqarpoq.

Nukissaqarnermut pilersaarusiornermi professori Frede Hvelplund isumaqarpoq aningaasat uuliasiornissamut atorneqartassanngitsut. Nukissiorfinnik ataavartunik misissuinernut aningaasat atorneqartalernissaat siunnersuutigaa, tassani aamma sipaarutaasinnaasunik nukissiornermi aningaasartuutigineqartut qanoq annikilliliiffigineqarsinnaanerat misissorneqarnissaa pingaartillugu.

- Aningaasat uuliasiornissamut gassimillu qaloorinissamut atorneqaannassappata silaannatsinnut kiatsikkiartuinnartumut sunniuteqassaaq. Taamaattumik inuiaqatigiit aningaasaataannik atornerluinertut taaneqarsinnaavoq. Ujaarlertoqarpormi atorneqaqqusaanngitsumut, Aalborg Universitetimi professori oqarpoq.

Paasissussat uku takutippaat
Københavns Universitet aamma Danmarks Tekniske Universitet (DTU) aningaasaliiffigineqartartuusut pappilissanik paasissutissartalinni takuneqarsinnaavoq. Universitetit taakku 2009-mit 2014 ilanngullugu katillugit 260 million koruuninik aningaasalerneqarput. 185 million koruunit misissuinernut atorneqarput, tassani piiaaffiusinnaasunik nutaanik ujarlernernut misissuinernullu atorneqarlutik. Taakkunanilu sinneruttut aamma qanoq piiarneqarsinnaanersut misissorneqarpoq.

Danskit naalakkersuisuisa 2050 nallertinnagu ikummatissanik atugaqarunnaarsimanissamik anguniarneqartoq DTU-mi aqutsisunit aamma anguniarneqartoq oqaaseqaatigineqarpoq.

- DTU-p nittartagaani atuarneqarsinnaavoq DTU siuttuulluni nutaanik eqqarsarnissamut ilinniartitsisartuusoq nukissaqarniarneq eqqarsaatigalugu. 2050 tikitsinnagu uulia gassilu pisariaqartitaraagut, DTU-mi prorektori Henrik Wegener oqarpoq.

Videnskab.dk-mi aamma atuarneqarsinnaapput:

Mærkeligt havvæsen skyllet op på dansk strand

Smukke billeder: Jorden rundt på ét minut

Miljøvenlig energi er dybt afhængig af fossile brændstoffer