Oqaatsit
Danskit napparsimmaviini pitsaanerusumik oqalutseqarnissamut periarfissaq
Danmarkimi nunap ilaani sipaarniarput, kisianni saniatigut video atorlugu oqalutseqarneq pitsanngortinniarpaat
Danskit napparsimmavianni passunneqarnissat pisariaqartissagukkut, attaveqaqatigiinnerlu kalaallisut ingerlakkusukkukku, kissaatigisat piviusunngortinnissaa ajornakusoorsinnaavoq.
Tassami danskit peqqinnissaqarfiani oqalutseqarniarneq ukiorpassuarni isornartorsiorneqartarpoq. Maannali atukkat pitsaanerulissagunarput.
Danmarkip nunap ilaani tallimani ataatsimut oqalutseqartitsineq aallutilerpaat, taammatut iliornikkut sipaarniartoqarlunilu pitsaassutimik annertusititsissaaq.
Assinganik periarfissaqassasut
Nunap ilaani immikkoortortaqarfiit ullumikkut oqalutseqarnermut ukiumut 140 millionit koruunit missaaniittut atortarpaat, allamiusut oqaaseqartut peqqinnissakkut qallunaatut oqaluttutut periarfissaqarnissaat taakku qulakkeertarpaat.
- Ataatsimut neqerooruteqarnikkut sipaaruteqangaatsiassaluta naatsorsuutigaarput, Danske Regioners udvalg for Sundhedsinnovation og Erhvervssamarbejdemi siulittaasoq, Stephanie Lose, aamma Region Syddanmarkimi siulittaasuusoq oqarpoq.
Nappaat suussusersinissaa ajornartoq
Lægeforeningimut siulittaasoq, Andreas Rudkjøbing, maanna oqalutseqarnerup pitsaassusaanut naammaginninngilaq:
- Iluameertumik oqalutseqarani nappaammik suussusersiniarneq ajornarluinnarsinnaasarpoq. Nakorsaatinilluunniit iisineq paasiuminaassinnaasarpoq - inunnulluunniit qallunaatuullaqqissunut. Tassuuna aamma unammilligassaqarpugut.
Oqalutsit ilinniarsimasut amerlanngitsut
Oqalutsit 7000-it akornanni amerlanerpaamik 300-t ilinniarsimasuupput.
- Minnerpaamik ilinniarsimasuusariaqarnerat qulakkeerneqartariaqarpoq. Suliaqartut oqaatsitigut pitsaanerusumik piginnaasalinnik aamma suliamut tunngasunik taaguutinik oqalutsiusinnaasunik pissarserusuttarput, Carina Gregersen oqarpoq.
Ataatsimut nunap immikkoortuini oqalutsinik neqerooruteqalernermi videokkut oqalutseqarneq pingaarutilittut inissisimavoq. Tamatuma siammarterneqarneratigut pitsaassutsimik kivitsisoqarnissaa aamma aningaasartuutinik ikilisaanissaq neriuutaavoq.
Videokkut oqalutseqarnikkut sipaaruteqassasut
Region Syddanmarkimit misilittakkat takutippaat, videokkut oqalutseqarnerup siammarterneqarneratigut nunap immikkoortuani 5 millionit koruunit missaanni ukiumut sipaaruteqartoqartoq. Minnerunngitsumik angalatitsinerup tungaatigut.