namminiilivinneq

Danskit aviisiat: Namminersorluni Oqartussaaneq illersorneqarli

Tallimanngormat Folketingimi apeqqarissaarluni oqallinnermi Kristeligt Dagbladip aamma Berlingskep nunatsinni namminiilivinnissaq pillugu apeqqut aviisini pingaarnertut allaaserineqarpoq

- Kalaallit Nunaata isumaginninermut aningaasaqarnermullu ajornartorsiutini iluarsiivigisariaqarpai, aviisimi Kriseligt Dagbladimi pingaarnertut allaaserinnittoq Henrik Hoffmann-Hansen allappoq.

Taassuma kalaallit namminiilivinnissamik kissaateqarnerat tunngaviusumik isumaqataaffigaa, taamaakkaluartoq Kalaallit Nunaata namminiilivinnerani atugarissaarnikkut annertuumik annaasaqarnissaq pillugu mianersoqqusivoq.

Københavnimiik aqutsisoqarnissaa piumanngikkaa

- Tallimanngornermi kalaallit namminiilivinnissamik kissaateqarnerat Christiansborgimi politikerit arlallit oqallisigimmassuk tunngaviusumik isumaqatigineqarpoq. Inuit nammineerusunnermik kissaateqarnerat tunngaviusumik ataqqisassaavoq, taanna Kristeligt Dagbladimi pingaarnertut allaatigisami allappoq.

- Namminersorlutillu Oqartussat aningaasaqarnermik aqutsisinnaanngippata, Kalaallit Nunaata aningaasaqarnera danskinit aqunneqalernissaannik Danske Folkepartiip isumassarsiaa tunngaviusumik aamma itigartinneqartariaqarpoq. Pitsaasumik aaqqiissutaanngilaq, neriuutiginarporli kalaallit nammineerlutik nunap isumaginninnermi aningaasaqarnermilu ajornartorsiutinik iluarsiissuteqarsinnaasunik politikerinik nammineerlutik qinersisinnaanissaat, allaaserisami aamma allassimasoqarpoq

Naalagaaffeqatigiinnerlu Danmarkimut iluaquteqartoq aamma erseqqissaatigaa, tamannami nunat tamalaat akornanni sunniuteqarniarnermut iluaqutaasarpoq.

- Nuummi piviusorsiunngitsumik takorluuinerit

Berlingskemi aaqqissuisuunerup Tom Jensenip isornartorsiuinerulluni allappoq.

- Piffissanngorpoq Kalaallit Nunaata Danmarkillu akornanni pissutsit pillugit eqqortumik oqaloqatigiittoqarnissaa.
Kalaalit Nunaanni isumaginninnikkut, ilinniartitaanikkut, aningaasaqarnikkulli ajornartorsiutaangaatsiarneri pillugit ammasumik oqaloqatigiissutigisinnaasariaqarput, taanna aviisimi pingaarnertut allaaserisamini allappoq

Tom Jensenip kalaallit namminiilivinnissamik kissaateqarnerat mittarfinnillu nutaanik pingasunik pilersaaruteqarnerat pillugu isornartorsiuivoq. Taanna 'suliniutinik piviusorsiortunik' taasaminik ujartuineruvoq.

- Kalaallit Nunaata siunissaa, ilisimasakinnermik tunngavilersorlugu aammalu Nuummi piviusorsiunngitsunik takorluuinernit aalajangerneqassanngilaq, Berlingske aviisimi pingaarnertut allaaserisami naggasiivoq.

Powered by Labrador CMS