Danskit aviisiat aarlerisaarisoq: Kalaallit Nunaat Grækenlandisut ilisinnaavoq

- Kalaallit Nunaata atugarissaarnermut siunissami aningaasanik suli atuisinnaassaguni, Kalaallit Nunaanni politikkikkut siammasissumik aaqqissuusseqqittariaqarpoq inuussutissarsiornerup tungaatigut.

Dagbladet Politiken ataasinngormat allappoq.

- Danmarkip tapiissutai Namminersornerup isumaqatigiissutaanit 'parnaaqqatinneqarput'. Kalaallit Nunaata aningaasaqarnera ingerlanerlulissagaluarpat tamanut ajoqqutaaginnassaaq, imaassinnaavormi Kalaallit Nunaat aningaasanik amerlanerusunik piumasaqalersoq. Naalakkersuisunngoqqammertut amerlasuunik anguniagassaqarput. Sanaartornikkut anguniagassat arlaqarput. Kalaallit Nunaata aningaasat isumatusaartumik atunngippagit Grækenlanditut ajornartorsiuleriaannaavoq. Taamaattoqalissappat atugarissaarnikkut aningaasat atorneqartussat aningaasat atukkat atorneqassapput, taamaasilluni ineriartorneq siumut ingerlajunnaassalluni.

Kalaallit Nunaata aningaasaqarnerata ilorraap tungaanut saatinneqassappat Naalakkersuisut siulittaasuata Kim Kielsenip siammasissumik aningaasaqarnerup pitsaanerulernissaa anguniarlugu sulissuteqartariaqartoq Politiken allappoq.

- Taamaasiornikkut inuussutissarsiutinik namminersorlutik ingerlataqartut pitsaanerusumik atugassaqartinneqalissapput. Kalaallit Nunaata tamanna atorfissaqartippaa. Tatiginartumik politikkikkut inissisimasoqalissappat siammasissumik suleqatigiittoqartariaqarpoq. Suliffeqarfinnut aamma Danmarkimut tamanna aamma atuuppoq, Politiken allappoq, nangillunilu:

- Kuannersuarni aatsitassarsiornerup Kalaallit Nunaata siunissaa pitsaanerulersinnavianngilaa. Kalaallit Nunaat pitsaanerusumik inissisimalernissaanut politikkerit innuttaasullu qitiulluinnarput.