Danskit aningaasanut inatsisaat: Kalaallit Nunaannut aningaasaliissutit 11 milliuunit koruuninik ilaneqartut

Nammineq suliffeqarfiliortussanut nunattalu illersuisoqarfianut immikkut aningaasaliisoqarnissaa, nunatta folketingimut ilaasortaatitaasa marluusut iluatsippaat. Danskit aningaasanut inatsisissaanni Kalaallit Nunaannut aningaasaliussassat 85 milliuunit koruunit saniatigut aningaasaliisoqarpoq.

Aaja Chemnitz Larsen Aleqa Hammond assigalugu aningaasaqarnermut ministerimut Kristian Jensenimut isumaqatiginninniuteqarpoq

Aaja Chemnitz Larsenip (IA) Aleqa Hammondillu (NQ) aningaasanut inatsisissamut isumaqatiginniarnermi aningaasanik amerlanerulaartunik aningaasaliisoqarnissaa iluatsippaat. Ukiuni sisamani tulliuttuni katillugit 11 milliuunit koruunit Kalaallit Nunaannut aningaasaliunneqassasut, Sermitsiaq.AG-p paasivaa.

11 milliuunit koruuninit 3,5 milliuunit koruunit nunatta illersuisoqarfianut aningaasaliisoqassaaq, taamaasilluni illersuisoqarfik 1 milliuunit koruuningajannik ukiumut ingerlatsinermut aningaasaliiffigineqartassalluni.

Taakku saniatigut inatsisinut atuutsitsinerup ilaani, kinguaassiutitigut kannguttaatsuliorsimasut katsorsarneqartarnissaannut aningaasaliisoqarpoq.

Danmarkimi kalaallit inuusuttut aallarnisaaruttunut illumik naatitsivimmik 7,5 milliuunit koruuninik aamma aningaasaliisoqassaaq. Illu naatitsivik NUKIGA-nut atassaaq, NUKIGA tassaavoq aallarnisaarusuttut eqqumiitsuliortullu pillugit suliniut. Illu naatitsivik pingaaruteqartunik sisamanik suliakkerneqassaaq:

  1. Misilittakkanik avitseqateqartitsisinnaaneq pilersissavaat, tassa inuusuttut aallarnisaasut misilittagalinnit ilinniartinneqarsinnaanissaat anguniarlugu. Aallarnisaasut akornanni attaveqaqatigiinneq pilersinneqassaaq.
  2. Ilinniartut suliffiillu akornanni attaveqartitsilissapput.
  3. Isumassarsianik pilersitsisinnaaneq siuarsassavaat.
  4. Aallarnisaasut attaveqaatissaannik aallarnisaassapput.

Suliniutit allat aningaasanut inatsimmut ilanngunneqarnissaat periarfissaavoq, taamaattumik aningaasaliissutigineqartussat annertunerusinnaallutik.

Ilinniartut qallunaatoornermik atuartinneqassapput

Aningaasaliissutit taakku saniatigut naalagaaffeqatigiinnerup nukittorsarnissaanut ukiunut sisamanut tulliuttunut katillugit 85 milliuunit koruuninik aningaasaliisoqareersimavoq. Aningaasaliissutit kultoorip iluani suliniutinut ilaatigut atorneqassapput, taakkulu sumorpiaq atorneqassanersut maanna isumaqatiginninniutineqaleruttorlutik. Ilisimatinneqarnerpulli malillugu aningaasaliissutinit 20 milliuunit koruunit ilinniartunut Danmarkimut tikittunut qallunaartoortitsinermut atorneqartassapput.

Powered by Labrador CMS