naalagaaffeqatigiinneq
Danskeq historikeri: Kalaallit namminiilivinnissaat Danmarkip sunniuteqarneranut aarlerinartoqarpoq
Nunarput namminiilivissagaluaruni Danmarkip Issittumi inissisimanera aamma USA-mut atassuteqarnernerani nukilaallisissavaa, oqaluttuarisaanermik ilisimasalik taama naliliivoq
Cataloniami kisimi namminiilivikkusussusermik takorluuineq sakkortunngilaq. Maani Nunatsinni naalakkersuinermik suliaqartut qanoq sukkatigisumik Danmarkimik isumalluuteqarunnaarnissaq ullulerneqassanersoq oqallisigaat.
Kalaallit naalakkersuinermik suliaqartut namminiilivinniarnermik kissaateqarnerat pimoorunneqartariaqarpoq, oqaluttuarisaanermik ilisimasaqartoq aamma lektor emeritus Thorkild Kjærgaard isumaqarpoq, taanna ukiorpassuarni Ilisimatusarfimmi sulisuusimasoq sisamanngornermi aviisimi Kristeligt Dagbladimi oqarpoq.
- Namminiilivinnissaq aningaasaqarneq eqqarsaatigalugu piviusorsiunngilaq, Kalaallit Nunaat ukiumut naalagaaffimmit tapiissutinik 3,6 milliardit koruuninik pisarpoq. Kisianni kalaallit naalakkersuinermik suliaqartut namminneq oqarluartaarnerminnit pisarineqarnissaat ernumassutigineqarsinnaavoq. Kalaallit Nunaanni namminiilivittoqarpat namminersortuunerup qulakkeerneqarnissaanut annertuumik ajornartorsiortoqarsinnaavoq, nunalu USA-mit ikiorneqartariaqalerluni, taanna aviisimut oqarpoq.
Danmark aamma eqqorneqassasoq
Kalaallit namminiilivippata kalaallit aningaasaqarnikkut kisimik eqqorneqassanngitsut oqaatigaa. Danmarkip nunanut allanut tunngasunut politikkianut annertuumik kinguneqartussaavoq.
- Hollandip aamma Belgiap Europamut saannerminni Indonesien aamma Congo annaaneqarnerattut, kalaallit namminiilivinnerata kingunerissavaa, Danmarkip USA-mut qanimut attaveqarnini piunnaarlugu Europamut saannerusariaqassaaq, Thorkild Kjærgaard erseqqissaavoq.
Namminiilivinnerup suna tamaat allanngortissavaa
Taanna naapertorlugu USA-mut qanimut peqateqarnerup Danmark Issittumi pissaaneqartippaa.
- Kalaallit namminiilivippata tamanna allanngussaaq. Danmarkip ukiorpassuarni USA malinnaaffigisarpaa, USA-llu nunanut allanut tunngasunut polikkianut apeqqusersuivallaaratik, taanna oqarpoq.
Kalaallit Nunaat naalagaaffeqatigiinnermit anippat, Danmarkip aamma Issittumi sunniuteqartarnini taamaatissagaa, adjunkti Jon Rahbek-Clemmensen Syddansk Universitetimeersoq aamma isumaqarpoq.
- Kalaallit Nunaat Naalagaaffeqatigiinnermut ilaatillugu, Danmark sumiiffimmi pingaaruteqarluartumi qitiusumik atuuffeqarpoq. Amerikamiut, russit, kinamiut canadamiullu issiaqatigisinnaavagut. Kalaallit Nunaat namminiilivippat, amerikamiut danskillu attaveqatigiinnerat allanngussaaq, Jon Rahbek-Clemmensen ilaatigut taama oqarpoq.