Pituffik
Dansk Industri: Pituffimmut isumaqatigiissut maanna atuuttoq sivitsorli
Greenland Contractorsip Pituffimmut kiffartuussinissamut isumaqatigiissutaata maanna atuuttup qaammatini arfinilinnit ukiumut ataatsimut, aaqqiissutissamik nassaartoqarnissaata tungaanut, sivitsorneqarallarnissaa Dansk Industrip siunnersuutigaa
Dansk Industri, Pituffimmi kiffartuussinissamut isumaqatigiissutip milliardinik nalillip amerikamiut suliffeqarfiutaannut annaaneqarnerani, sapaatip akunnerani kingullermi sisamanngornermi politikkikkut akuleruttoqarnissaanut piumasaqartoq, maanna siunnersuuteqarpoq Greenland Contractorsip kiffartuussinissamut isumaqatigiissutaa ullumikkut atuuttoq, aaqqiissutissamik nassaartoqarnissaata tungaanut, qaammatinit arfinilinnit ukiup ataatsip tungaanut sivitsorneqartariaqartoq.
- Aaqqiissutissaq Kalaallit Nunaannut aningaasanik taarsiissuteqarnermik kinguneqaannartussaq akuerineqarsinnaanngilaq. Issittumi ukiuni tulliuttuni unammilligassaqarpugut annertuunik. Taamaammat pingaaruteqarpoq aalajangiusimassagipput danskit kalaallillu suliffeqarfiutaasa Issittumi suliaqarnermut ilisimasaat. Taamaammat danskit naalakkersuisuisa USA-mut piumasaqarnertik aallutiinnartariaqarpaat, tassalu Pituffimmi kiffartuussinissamut isumaqatigiissummik danskit imaluunniit kalaallit suliffeqarfiutaat kisimik qangalili USA-mut isumaqatigiissutaareersut malillugit pisariaqartoq, Frank Bill, Dansk Industrip ataani illersornermut sanaartornermut tunngasunut immikkoortortoqarfiup allattoqarfiani pisortaq oqarpoq.
Atuaruk: Nunanut allanut ministerip iliuuseqarnissaa Dansk Industrimit piumasarineqarpoq
DI-p Folketingimi amerlanerussuteqartut tapersersorpai
Folketingimi amerlanerussuteqartut isumaqarput Exelis Servicesip Pituffimmi kiffartuussinissamut isumaqatigiissummut tigusinera, Danmarkip USA-llu isumaqatigiissutigeriigaannut naapertuutiginngitsoq, taamaattumillu kiffartuussisussarsiorluni suliariumannittussarsiorneq unitsinneqartariaqartoq. Taamatullu isummerneq Dansk Industrimit taperserneqarpoq.
- Iluarisimaarlugu paasivarput nunanut allanut ministeri, Martin Lidegaardi, suliami uani Dansk Industrimut isumaqatiginnittoq. Maannalu pisariaqarluinnalerpoq nunanut allanut ministeri amerikamiunut suliami uani aalajangersimalluinnarnissaa. Maanna tassa piffissanngorpoq USA-p aamma Danmarkip qanittumik ikioqatigiillutik suleqatigiinnisamut ikinngutigiinnissamullu oqaaserisartagaat ilumoornersut paasissallugu, Frank Bill oqarpoq. Taassuma aamma maluginiarsimavaa suliaq pillugu nunanut allanut ministerip, Martin Lidegaardip, amerikamiut nunanut allanut ministeriat, John Kerry, ataatsimeeqatigisimagaa, soorlu aamma amerikamiut politikerit allat qaffasissut, taakkualu atorfilittaat ataatsimeeqatigisimagai.
Pituffik pillugu allaaserisat allat uani atuakkit