Assammik arsarluni VM

Danmarkip Sverige ajugaaffigaa kvartfinalimullu anngulluni

Herningimi Boxenimi isiginnaartut tunniusimasorujussuit qallunaat arnat assammik arsartartut VM-imi 1/8-finalimi Sverigemut ajugaaneranni ikiorpaat

Danmarkip unammisartuisa ilaat Sandra Toft, Kristina Kristiansen, Louise Burgaard aamma Mette Gravholt unamminerup kingorna nuannaarput, sapaatiummat unnukkut Herningimi Jyske Bank Boxenimi VM-eqarnerani 1/8-finalimi Danmarkip Sverige 26-19-imik ajugaaffigimmagu. Taamaasillutik kvartfinalimut OL-imullu anngupput

Herningimi Boxenimi isiginnaartut illersuisorujussuit isiginnaartoralugit qallunaat arnat assammik arsartartut sapaatiummat unnukkut kvartfinalimut anngupput, Sverige 26-19-imik ajugaaffigilluareerlugu.

Qallunaat isiginnaartut ersaattaapput, nilliallutik pississaarlutillu nateq sajuppilutsillugu, isiginnaartullu illersuinerujussuat unammisunit malugineqarsinnaavoq.

– Ullumi unammineq nalissaqanngilaq. Manna tikillugu unamminermi taama nuannertigisumi peqataagunarpunga, Stine Jørgensen oqarpoq.

– Tusaaneqarsinnaavoq inuit isiginnaartut tumerparpaarpalui. Ersaartaapput suaartarlutik, nilliallutik erinarsorlutillu tupinnaannavissumik. Ilumut nalissaqanngivippoq. Ullumi unammineq nuanneqaaq, taanna oqarpoq.

Qallunaat målmandiata Rikke Poulsenip qallunaat isiginnaartut tapersersuinerujussuat killisimaarnarteqaa.

– Qanoq sualutsigisoq oqaatigisinnaanngilara. Uummatiga suli kassuttorujussuuvoq. Isiginnaartut svenskinik tatisiniarnerat tupinnaannavippoq, taanna oqarpoq.

Louise Burgaardip aamma isertuutinngilaa nuannaarutigalugu qallunaat isiginnaartut unneqqarinniarunnaarlutik akeqqanik tatisiniartalersimammata.

– Boxen ullumi qoqernaannavippoq. Malugisinnaalluaqaarput ullumikkut Boxen uagut pigigipput, uagullu angerlarsimaffimmi unammisugut, taanna oqarpoq.

– Isumaqarpunga kissassernitsinni nipaappallaangajassimasut, taavali unamminermi nipparujussuarput svenskinik tatisiniaallutik. Tassa taamaassaaq, taanna oqarpoq.

Pingasunngorpat kvartfinalimi Rumænien unammissavaat, rumæniamiut nunarsuarmi pissartat Brasilien unammiuaarnermit anisimmatigut 25-22-mik ajugaaffigalugit.

Powered by Labrador CMS