VM-imut anngunniunneq
Danmarkip Poleni kanngunarsarpaa VM-imulli neriuuteqaleqqillutik
Danskit isikkamik arsaallutik nunanut allanut unammisartuisa Polenimut 4-0-mik ajugaanermikkut VM-imut anngunnissamut periarfissaneqqipput.
Unamminerup immikkoortuani siullermi Thomas Delaney aamma Andreas Cornelius isertitsisuupput, unamminerullu immikkoortuata aappaani Nicolai Jørgensen aamma Christian Eriksen isertitsisuullutik.
Aallartilluartut
Danmarki tallimanngornermi VM-imut anngunniunnermi aallartilluaqaaq, arsaannerlu ataatsimut isiginerani arsaannermik aqutsisuullutik, Åre Hariedellu sungiusaasuulernerata kingorna aatsaat taamak arsarluartigaat.
Hareidi tupaallatitsilluni arsaattut naliginnaasumik inissisigisartagaanniit allamut nuussorsimavai soorlu Andreas Cornelius arsaattarfiup sinaatigut saassussiartunngortillugu Riza Rumisilu isersimaqqaartinnagu Jens Stryger inigisartagaaniitissimallugu.
Pione Sisto saassussisartunut pingasunut ilaavoq, Andreas Bjellandillu Simon Kjær tunuarsimasooqatigalugu.
Nukittoorlu Henrik Dalsgaard tunuarsimasup talerperleraat saassussilluaqattaaqalunilu.
Taama unammisartunik nussuisimaneq iluaquserneqarpoq. Danskit ajugaarusussuseqarlutik arsaalluarput, polenimiulli arlaleriarlutik pinnguariteqattaarlutik.
Delaney nunanut allanut unammisartuni isertitaa siulleq
Christian Erikseni minutsit 15-it ingerlareerneranni arsaattarfiup teqeqquaniik periarfissarsionermi Delaney paarineqanngitsoq tunimmagu niaqqumik isertitsineratigut Danmark 1-0-mik siuarpoq.
Delaney unammineq minutsimik ingerlariitsiaannartoq ungasianiik misileereersimangaluarpoq, Poleniulli målmandiata Lukasz Fabianski arsaq annaateriarnerani målit qulaatsissimavaa.
Parkenip silataani biilit tulleriissaarnerpassui ajornatorsiutaallutik isiginnaariartussarpassuit 34.505-t isiginnaarfissaminnut apuussimanngillat.
Unamminerullu immikkoortuata affaa tikillugu isiginnaariartorpassuit isaarujoorsimapput, piffissap ingerlanerani Danmark arlaleriarluni isertitsinissamut periarfissaqartarsimangaluarpoq atorluaasarsimanatillu.
Ilimagineqalereersimavorlu Danmarki ajungaanissani qulakkeereersinnaalluaraa.
Marloriaatinngortoq
Tamannalu unamminerup immikkoortuani minutsit pingasut amigaataalersut, Christian Eriksenip tunisillaqqissutsi takuteqqereeraalu Corneliusip piviusunngortippa.
Eriksenip arsaq nammineq tigusimavaa, taamugaannarlu tunisinani Tottenham-imi arsaattartup nakkaannartumik Corneliusi paarineqanngitsoq tunivaa taannalu 2-0-imut isertitsivoq.
Poleni periarfissaqartarsimavoq, ingammik Robert Lewandowskip arsaq målit saavanni tigungaangamiuk ernumanartorsiortitsisarsimalluni.
Danmarkip unamminerup immikkoortuata aappaani arsaannermik aqutsisuuvoq.
Erikseni arsarlualaavittoq
Arsarluaqisoq Erikseni ingasariaannarsimavoq, isertitseriarneralu arsaq Fabianskip utersaartittariaqarsimavaa Nicolai Jørgensenillu arsaq utersaartoq nangillugu naqqatigoortillugu isertippaa 3-0-imillu siuaqqalerlutik.
Isiginnaariat Nicklas Bendterip isertinneqarnissaa piumasarisimavaat, minutsillu 75-issaanni ukiut marluk peqataanngeriarluni peqataaqqilernera assut nuannaarutigineqaqaaq.
Eriksenip arsarluarsimanini minutsit 80-t qaangiunneranni akilerluarpaa, taannami kingullersaalluni isertitsisuuvoq danskillu 4-0-mik ajugaapput.
/ritzau/