Vittus nassuiaavoq:

Danmarkip aatsitassarsiorneq tiguaa

Namminersornermut inatsimmik unioqqutitsinermik Vittus Qujaukitsup Danmarkimut saassussinini ilaatigut tunngavilersorpaa, KNR taama allappoq

Vittus Qujaukitsoq danskit naalakkersuisuinut danskit tusagassiorfiini sakkortuumik oqariartuuteqarnissaminut pissutissaqarluarluni isumaqarpoq. Tassami ilaatigut Danmarkip aatsitassanut tunngasut utertinnerisigut, danskit nunanut allanut ministeriaqarfiata Ironbarkip Citronen Fjordimi Tunup avannaani 'akuersissummik' nassiussisimammat.

Atuaruk: Vittu ingerlaannassaaq

Nunanut allanut tunngasunut naalakkersuisup Inatsisartut ataatsimiititaliaannut tallimanngornermi nassuiaatigisimasai, KNR-ip allagaatinik takunnikkumanikku pissarsiamini tamanna saqqummiuppaa.

- Ilisimatitsissutigaara Danmarkip alloriarneq tamanna ingerlatissappagu isumaqatigiissutinik ersarissumik unioqqutitsissasoq, aatsitassarsiornermummi inatsit Kalaallit Nunaannit 2010-mi tiguneqartup danskit oqartussaasuinut utertinneqartariaqarneranik kinguneqassammat, Vittus Qujaukitsoq nunanut allanut sillimaniarnermullu ataatsimiititaliamut taama allassimasoq KNR-ip issuarpaa.

Atuaruk: Kielsen apeqqutinut akissuteqassaaq

Akuersineq unioqqutitsinerusoq
Ironbarkip Citronen Fjordimi aatsitassarsiornissamik pilersarutaanut nunanut allanut tunngasunut ministereqarfik "akuersissuteqarsimaneranik" Namminersorlutik Oqartussat isornartorsiuteqarlutik allagaat, Qujaukitsup ataatsimiititaliamut uppernarsaatissatut nassarpaa.

Namminersorlutik Oqartussani atorfilittat taanna akuersissut pineqartoq atunnginnerarpaat, aatsitassaqarneq kalaallit akisussaaffigimmassuk, KNR-imi allaaserisami tamanna allaqqavoq.

Atuaruk: Isumasioqatigeereernermi paasisat naammaginngilai

Qallunaat anneruniartut
Sapaatip akunnerani kingullermi Vittus Qujaukitsup tamanut oqariartuutigaa, qallunaat ilaatigut anneruniartutut taagorpai, Kalaallit Nunaata nunanut allanut tunngasunut aamma sillimaniarnermut politikkimut sunniuteqarnerunissamik kissaateqarnera soqutiginnginnera pissutigalugu. Tamatuma saniatigut USA Pituffimmit anisinneqarnissaa aamma naalagaaffeqatigiinnermit aninissamut sioorasaaruteqarpoq.

Taassuma oqariartuutai diplomati aamma naalagaaffeqatigiinnermi suleqatigiinneq pillugu oqallitsitsingaatsiarput, Vittus Qujaukitsorlu nassuiaanissamut ataatsimiigiarnissamut aggersarneqarpoq.

Atuaruk: Vittup Danmark USA-lu sioorasaarpai

Pituffik aamma Camp Century
KNR naapertorlugu Vittus Qujaukitsup Inatsisartuni ataatsimiititaliamut nassuiarsimavaa, "Danmarkip Thule Air Basemi sullissinissamut isumaqatigiissutikkut sumik angusaqarusunnera aammalu Inatsisartut Naalakkersuisullu tamatumuunakkut nunatsinni inuiqatigiinnut isertitsissutaanerunissaannik kissaataat aaqqiagiinngissutaasoq".

Tamatuma saniatigut atuarneqarsinnaavoq, danskit naalakkersuisuisa sakkutooqarfiusimasumik Camp Centurymik suliamik ingerlatsinerat Qujaukitsup naammagisimaanngikkaa:

Atuaruk: Issittumi suleqatigiinneq isornartorsioraa

- Maanna ukiut pingajussaannik raatiup qinngorneranik mingutsitsisoqarsimasinnaaneranik misissuinissamut kalaallit kimigiisernerigaluat Danmarkimit itigartittuarneqarsimavoq, ilisimaarikkassittullu Danmarkip novembarimi ilisimatitsissutigaa maanna inatsisitigut isumaqatigiissutit misissuiffigineqalersut, akisussaaffimmik inissiisoqartinnagu, Vittus Qujaukitsoq, KNR naapertorlugu ataatsimiititaliamut allappoq.

Powered by Labrador CMS