Danmarkimut nuuttartut ikiorneqartariaqarput

- Kalaallit Danmarkimut nuuttartut immikkut ikiorneqarnissaat qangali ujartugaraarput. Tassami suliffeqarfinnit akuerisaaniaraanni qallunaatut ilinniarnissaq pisariaqarsinnaavoq.

Folketingimi ilaasortaq, Doris Jakobsen, kalaallit Danmarkimut nuuttartut oqallisigineqarnerini oqarpoq.

Peqatigiit Naalagaaffeqatigiit kalaallit nuuttartut inuttut ajornartorsiortut kalaallit qallunaallu ataatsimoorlutik politikkikkut iliuuseqarnissaannik kissaateqarluni oqariartuuteqarpoq. Enhedslistenillu paasissutissat qallunaat nunaannut tunngasut Nunatsinni pissarsiassaassasut oqariartuutigaa, aamma kalaallit tikikkaangata nunanit allanit tikittartutut ikiorneqarnerunissaat ujartorpaa.

Doris Jakobsen, qanittumi Sundholmimi angerlarsimaffeqanngitsut unnuisarfianni kalaaleqarfiusumi pulaaqqammersoq, tikkuaavoq kalaallit nunanit allaniit nuuttartutut ikiorneqartariaqartut, assersuutigalugu inissarsiornissamik siunnersorneqarlutik.

- iliuuseqarnissamut aningaasaliissutissat isumaqatigiinniitigigatsigit iliuuseqapallattoqarnissaa kaammattuutigaarput. Taamaattorli amerlanerussuteqartut nuna tamakkerlugu iliuusissamik pilersaarusiorneq utaqqeqqaarumavaat, Doris Jakobsen Sermitsiaq.AG-mut oqarpoq.

Atuaruk: Enhedslisteni: Kalaallit Danmarkimiittut immikkut iliiuseqarfigineqassapput

Nuunnerit immikkut pineqartariaqartut
Inuit Ataqatigiit maluginiaquaat nalagaaffik immikkut ittumik pisussaaffeqartoq.

- Folketingimi maluginiaqqujuarparput Damarkimi kalaallit ikiortariallik allatulli pineqarneq ajortut. Naalagaafiullu immikkut ittumik pisissaaffeqarnera aamma maluginiaqqusarlugu, folketingimi ilaasortaq, Johan Lund Olsen, Sermitsiaq.AG-mut oqarpoq.

- Taamaammat nuannaarutigaara isumaqatigiinniarnikkut 8 millionit koruuninik Socialministeriap Kalaallillu illuisa atugassaannik immikkoortitsinikuugatta, folketingimi ilaasortaq oqarpoq.

- Aningaasat taakku kalaallit pisariaqartitsisut immikkut ittumik tulluussarneqarnissaat, assersuutigalugu tikinnermi ikiorneqarnikkut, qulakkiissavaat. Neriuppunga danmarkimi kommunit kalaallit immikkut iliuuseqarfiginissaannut pisussaaffeqarnertik maluginiassagaat, Johan Lund Olsen oqarpoq.

Atuaruk: Danmark kalaallinut eqqaaviussanngilaq

Dansk Folkeparti isumaqataanngilaq
Dansk Folkepartip Kalaallit Nunaanut tunngasunik oqaaseqartartua isumaqataanngilaq.

- Kalaallit nunanit allaneersutut pineqartarnisaat isumaqatiginngilara, Søren Espersen, Dansk Folkepartimeersoq, Sermitsiaq.AG-mut oqarpoq.

- Kalaallit Savalimmiullu uanga naalagaaffeqatigigakkit nunaqqatitut isigaakka, københavnimilu najugaqalerunik Jyllandimeersutut Fynimeersutullu pineqassapput, Espersen oqarpoq.

- Isumaqarpunga innuttaasut atugaat eqqarsaatigalugit unammilligassarpassuaqartoq, ilarpassui inuiaqatigiit naqqani inuupput, tamakkuli kommunit sulisssaraat - Aalborgimeersuugunik, Klaksvikimeersuugunik Upernavimmeersuugunilluunniit.

- Kalaallit nunaqqatitut isigaakka, allatulli pisinnaatitaaffeqarlutillu pisussaaffillik. Kalaallit immikkut pineqalissappata nunanit sorsuffiusunit qimaasutut pissavagut, Søren Espersen oqarpoq.

Kalaallinut nuuttunut nutaamik suleriaasiliorneq
Socialministeriaq maajimi 2014-imi suleriaaseq nutaaq, kalaallinut tikerlaanut pisariaqartitsisunuy iluaqutaasussaq, saqqummiunneqarpoq.

- Sullisseriaatsip qulakkiissavaa kalaallit pisariaqartitaannik, tassa danskit ataqatigiissakkamik aaqqissuussaanerat qanoq ittuuneranik, ilisimatitsineq. Suleriuutsip inuinnaat, nammineq piumassutsimik ikiuisut kommunillu akornanni kalaallit iluaqutigisinnaasaannik ataqatigiittoqalerneranik kinguneqassaaq. Aammattaaq kalaallit ajornartorsiuteqareersut tikikkaangata pinaveersaartitserpalaartumik ikiorneqartarnissaat qulakkeerneqassaaq, Anette Vilhelmsen, isumaginninnermut ministeriusimasoq, taamani allappoq.