Japanimiinneq
Danmarkimit namminiilivinnissaq unitsinneqarallarpoq
Danmarkimit namminiilivikkiartornissaq maannakkut sulissutigineqanngitsoq Tokyomi Issittoq pillugu siunnersueqatigiittoqarnerani Naalakkersuisut siulittaasuat Siumumit Kim Kielsen oqarpoq
Tokyomi Issittoq pillugu siunnersueqatigiittoqarnerani peqataasumit Naalakkersuisut siulittaasuannut Kim Kielsenimut apeqqutigineqarpoq Kalaallit Nunaat qaqagu Danmarkimit namminiilivissanersoq. Kalaallit Nunaanni partiit tassunga apeqqummut aamma assigiinngitsunik isumaqarnersut apeqqutigineqarportaaq.
Kalaallit Nunaanni ajornartorsiutit iluarseqqaartinnagit Danmarkimit namminiilivinnissaq sulissutigineqalersinnaanngitsoq Kim Kielsen apeqquteqartumut akissuteqarpoq. Namminiilivinnissamut suliaq Kalaallit Nunaanni inuusuttut suliassariumaaraat aamma oqaatigaa.
Kalaallit Nunaanni ilinniartitaanerup qaffassarneqarnissaa pingaartillugu Kim Kielsenip oqaatigaa. Aamma ineqarnerit aserfallatsaaliorneqarnissaat ilanngullugu oqaatigaa. Aningaasaqarnerup inissisimanerata pitsaanerulernissaa aamma anguniarneqassasoq oqaatigaa, taamaasilluni innuttaasut aningaasatigut isertitaat qaffassarneqarsinnaammat. Inuppassuit aningaasarsiakippallaartut oqaatigaa, oqallinnermi oqarpoq.