ministerinngortitsineq
Danmarkimi nutaanik ministerinngortoqartoq
Statsministeri Helle Thornings-Schmidt nutaanik ministerinngortitsineq nukissanik nutaanik tunisisoq oqarpoq. Neriuutigaalu naggataamik ministerinik taarsiilluni
Qaammatit marluk qaangiupput Helle Thorning-Schmidt (S) kingullermik ministerinik taarsiigami. Ministerinik taarsiigami oqaatigaa qinersinnginnermi neriuutigalugu naggammik ministerinik taarsiilluni.
Helle Thorning-Schmidt ministerissat nutaat Amalienborgimi ilisaritikkiartorneranni assinganik oqarpoq.
- Naggataamik nutaamik ministerinik taarsiisoqarpa?
- Ministerinik taarsiigaangama neriuutigisuaannarpara naggataamik taarsiillunga. Taarsiigaangama eqqarsartuaannarpunga ajunnginnerpaat ministerit taasimallugit. Aamma maannakkut isumaqarpunga, Helle Thorning-Schmidt oqarpoq nangillunilu:
- Maannakkulli pisoq allaaneruvoq, SF-imi ministerioqataajunnaarpoq. Naalakkersuineq nutaaq maannakkut aallartippoq, tamannalu malugineqarsinnaavoq. Nukissamik nutaamik tigusivoq, Helle Thorning-Schmidt oqarpoq.
Socialdemokratit politikkikkut oqaaseqartartuat Magnus Heunicke (S) angallannermut ministerinngortinneqarpoq, Kirsten Brosbøl (S) tupaallaatigineqartumik avatangiisinut ministerinngortinneqarluni.
- Nutaanik ministeriliornerput nuannaarutigaarput, tassanimi Radikalit Socialdemokratillu agguarneqarluarsimallutik. Ingerlalluassaagut, Helle Thorning-Schmidt oqarpoq.
Decembarimi kingullermik ministerinik taarsiisoqarpoq. Morten Bødskov Christiania pillugu suliami isornartorsiorneqareerluni ministerisut soraarsitaavoq, Villy Søvndal (SF) peqqiillinini pillugu nunanut allanut ministeriujunnaarluni.
Taamani Helle Thorning-Schmidt ima oqarpoq:
- Ministerinik paarlaavugut pisariaqarmat, aammalu politikkimiit tunuartoqarneratigut paarlaalluta. Neriuutigaara kingullermeerlunga ministerinik allannguissallunga, Helle Thorning-Schmidt decembarimi oqarpoq.
Qaammatit marluk qaangiutiinnartut nutaanik ministerinngortitsivoq. Ministerit nutaat dronningimut ilisaritippai. SF naalakkersuinermi peqataajunnaarput Dong-ip aktiaataasa ilaat Goldman Sachs-imut akigineqarnerat pissutaalluni.
Ukiup affaa ingerlanerani sisamariarluni ministerinik allannguisoqarpoq. Aggustimi, novembarimi, decembarimi februaarimilu allannguisoqarluni.