paarlaanerit
Danmarkimi naalakkersuisoqarfinni pisortaasut soraarsitaannginnerusartut
Namminersorlutik Oqartussani atorfilittat atorfimminnit suliunnaajaartarnerat ilisimaneqartuuvoq. Danmarkimili assinganik atorfillit piffissami sivisunerusumi atorfimminniittarput
(Allaaserineqartoq nalunaaqutaq 10.54 nutarterneqarpoq)
- Danmarkimi aamma taamatut pisoqaannavittarpoq.
Namminersorlutik Oqartussani atorfilittat qanoq taarseraatsigisarnerat pillugu apeqquteqartoqaraangat taamatut akisoqartarpoq. Assersuutigalugu Naalakkersuisut siulittaasuata naalakkersuisoqarfiani pisortaasimasoq Svend Hardenberg ukiut marluk ataatilaarlugit atorfeqareernermi kingorna atorfimminiikkunnaarpoq.
Hardenberg qaammatini 18-ni tulliuttuni suli akissarsiaqartinneqartussaavoq.
Danmarkimi atorfilittat aamma paarlakaattartorujussuuppat? Immaqaluunniit Kalaallit Nunaanni naalakkersuisut nikerartarnerisa pissutigisaanik atorfilittat sivisuumik artorfeqarneq ajorpat?
Tamanna paasiniarlugu Sermitsiaq.AG Danmarkimi ministeriaqarfinnik paasiniaavoq. Akissuteqartunit nalunaarutigineqartarpoq atorfilittat utoqqalinersiaqalernertik pissutaalluni imaluunniit nutaamik atorfeqalerusunnertik pissutigalugu atorfilittatut suliunnaartartut ilisimatitsissutigineqarpoq.
Atorfikkaanngunngikkunik soraarninngortartut
Namminersorlutik Oqartussani atorfilittat paarlakaattorujussuupput 2012-mit 2015-ip tungaanut. Piffissami tamatumani danskit ministeriaqarfiini 13-iusuni pisortaanerit sisamat atorfimminiikkunnaarput.
Aningaasaqarnermut ministeriaqarfimmi pisortaasimasup David Hellemannip atorfimminit tunuarnera maluginiarneqarnerpaavoq. Ministeriaqarfimmi ukiut sisamaat avillugu atorfeqareernermi kingorna pisortaanertut tunuarpoq. Taanna pereersoq Head of bankingimi Nordea-mi atorfittaarpoq, tassanilu suli atorfeqartuulluni. Avatangiisinut ministeriaqarfimmi Marianne Thyrring aamma taama sivisutigisumi atorfeqarpoq.
Naalakkersuisunut suleqataareernermi kingorna Danmarks Meteorologiske Institutimi pisortanngorpoq.
Bo Smith aamma Henrik Nepper-Christensen atorfeqarnermut ministeriaqarfimmi aamma ilageeqarnermut ministeriaqarfimmi pisortaanertut 2013-mi tunuarput. Soraarninngornertik pissutigalugu atorfimminnit tunuarput, paarlanneqarlutillu.
Ilageeqarnermut ministeriaqarfimmi Henrik Nepper-Christensen pisortaaninngorpoq, atorfeqarnermullu ministeriaqarfimmi Anne Kristine Axelsson pisortaaninngortinneqarluni. Akileraartarnermut ministeriaqarfik saaffiginnissummut akissuteqanngilaq. Ministeriaqarfik Helle Thorning-Schmidtip akileraartarneranut tunngatillugu misissuisoqarnerani qitiusutut inissisimavoq, pisumilu tassani pisortaaneq Peter Lof soraarsinneqarluni. Ministeriaqarfimmi tassani Jens Brøchner pisortaanertut atorfeqalerpoq.