Greenland Express Air
Danmarkimi ilinniagaqartoq: Ukiumut marloriarlunga angerlartalernissannut akissaqalerpunga
Sara Høegh Egedep akulikinnerusumik Greenland Express Air atorlugu Narsaliartalernissani nuannaarutigaa
Greenland Express Airip timmisartua Fokker-100 Narsarsuarmut nalunaaqutaq 12.15 tikimmat timmisartumi Sara Høegh Egede Narsameersoq Danmarkimi ilinniagaqartoq ilaaqataavoq.
- Siumut utimullu angalanissara 3.800 koruunilerpara. Angalaneq akikittorujussuuvoq. Danmarkimi ilinniagaqarpunga, taamaattumillu sipaartariaqartarlunga. Nittartakkakkut qaammat kingulleq inniminniivunga. Akikinnerusumik angalasoqarsinnaalernera nuannaarutigaara, Air Greenlandimummi ilaalluni akisoqaaq. Greenland Express Airip akigititai atorlugit ukiumut marloriarlunga ilaqutakka Narsamiittut tikeraarsinnaalerpakka, tamanna assut iluarpoq, Greenland Express Airip angallasserngaarnerani ilaasut ilaat Sara Høegh Sermitsiaq.AG-mit apersorneqarluni oqarpoq.
Greenland Express Airip angallasserngaarnera pillugu allaaserisat aviisimi Sermitsiami tallimanngorpat atuarneqarsinnaapput