Sundhed
Danmarki nunat avannarlerni ajornerpaamik peqqinnissaqarfeqarput
Nunarsuarmi peqqinnissaqarfiit systiimiisa pitsaasusaanik naliliinerup nutaap takutippaa Danmark normu 24-soq eqqaamiui Norge, Sverige, Island Finlandilu angusaqarnerullutik.
Nunanit avannarlernit tamanit Danmark ajornerpaamik peqqinnissaqarfimmi systiimeqarpoq, nunarsuaq tamakkerlugu peqqinnissaqarfiit systiimiinit misissuinerup takutippaa. Taama allappoq Videnskab.dk.
Island, Sverige, Norge Finlandilu allattuiffimmi pitsaanerpaamik inissisimasut Danmark nunani 195-ni normu 24-voq, nappaatit katsorsarneqarsinnaasut pineqartillugit soorlu sualummik sukkorneq, aqajaqqukkut putusoorneq kræftimillu nappaatitit ilaat pillugit toqukkut annaasaqarneq pinngitsoortinniarlugu peqqinnissaqarfiit piginnaasaat pineqarput.
- Misissuinerup takutippaa arlalinnik peqqinnissaqarfiit pitsanngorsaasinnaasut. Danmark qiviaraanni sualummik sukkorneq sukkornerullu kingunerisaanik aningorsinnaanngisamik tartulunneq pillugit suliassaqaqaat, Kim Moesgaard Iburg, Aarhus Universitetimi peqqinnissaqarfiit pillugit pisortaasoq misissuinermullu danskit peqataatitaasa ilaat oqarpoq.
Professori: Misissuineq soqutiginartoq - sanngiiffilik
Peqqinnissaqarfiit systiimiisa kitaani nunat pisuut OECD-millu nunat taaneqartartut kisiisa pinnagit tassaavoq misissuineq siulleq, nunarsuarli tamakkerlugu ukiut 25-t ingerlaneranni nunani 195-usuni sanilliunneqartoq.
Peqqinnissaqarfiit aningaasaqarneranut proffessori Rikke Søgaard Aarhus Universitetimiimeersup misissuinermi soqutiginartumi sanngiiffiit arlallit uparuarpai. Pingaarnertut qularaa, nappaatit arlallit tunngavigalugit toqukkut qimaguttut amerlassusaat naapertorlugit peqqinnissaqarfiup pitsaassusaanit nalilersuineq. Assersuutigalugu Danmarkimi pingaartinneqarmat uninngasut ilaqutaallu pisinnaatitaaffiinik ajunnginnerpaamik peqataatinneqarnissaat qulakkeerniarneqartarmata.
- Uagut Danmarkimi soorlu pinaveersaartitsinermut katsorsaanermulluunniit aningaasanik pingaartitsinerup aqqani, inuunerup sivisunerunissaa pinngikkaluarlugu taamaattorli soorlu inuuneq pitsaaneq inuugallarnermi qulakkeerniarlugu suligutta pattalaarneqarneq ajorpugut. Tamanna aammattaaq katsorsaatit akisuut pisinnaanerannut imaluunniit sukkasuumik aaqqiissutit utaqqisunullu allattorsimaffiit pillugit politikkerput pineqarput, Rikke Søgaard uparuaavoq.