ministerip tikeraarnera
Danmarki Nunarpullu ilinniartitaanermi ilisimatusarnermilu suleqatigiissapput
Ilinniartitaanermut ilisimatusarnermullu ministeri Sofie Carsten Nielsenip tikeraarnermini Kalaallit Nunaanni ilinniarfeqarfiit ilisimatusarfiullu ilaatigut pulaassavai
Ilinniartitaanermut ilisimatusarnermullu ministeri Sofie Carsten Nielsen Radikale Venstreneersoq Kalaallit Nunaannut tikeraarpoq ulluni makkunani. Nuuk aamma Sisimiut tikeraassavai, Ilinniartitaanermut ilisimatusarnermullu ministeriaqarfik tusagassiutinut nalunaarpoq.
Nick Nielsen aamma Kim Kielsen Naalakkersuisunut ilaasortaasut ataatsimeeqatigissavai, taakku ilinniartitaanermut, kultureqarnermut, naligiissitaanermut ilageeqarnermillu kiisalu pinngortitalerinermut avatangiisinullu naalakkersuisuupput.
Ilinniaqqiffissat
Ministerip naalakkersuisullu marluk atsioqatigiissapput, tassani kalaallit Danmarkimi ilinniaqqiffiini ilinniaqqissinnaanerata attatiinnarnissaa atsioqatigiissutigineqassalluni, kiisalu Danmarkip Kalaallit Nunaatalu akornanni aatsitassarsiorneq pillugu siunnersuisarnerit aamma attatiinnarneqarnissaat atsioqatigiissutigineqassalluni.
Tikeraarnermini aamma pulaassavai Pinngortitaleriffik, Ilisimatusarfik kiisalu Center for Arktisk Teknologi, taanna Kalaallit Nunaata Danmarkillu suleqatigiillutik issittumi ingeniørinik ilinniartitsiffiuvoq.