Danmarki: Kalaallit Nunaat nuuffigissallugu soqutigineqarnersaat tulleraat

20.123.

Danskit taama amerlatigisut Danmarki 2014-mi qimappaat.

Ukiup siulianut sanilliullugu nunanut allanut nuuttut 3,4 procentimik ikileriarput. Ukioq 2009 eqqaassanngikkaanni inuit aatsaat taama ikitsigisut nuupput ukiumi tuusintilikkuutaani matumani.

Tamanna danskit naatsorsueqqissaartarfianni Danmarks Statistikimi atuarneqarsinnaavoq.

Angutit arnanit amerlanerusut Danmarki qimappaat. Angutit 10.504-t Danmarki 2014-mi qimappaat, arnat 9619-t nunanut allanut nuuttut. Aamma angutit ukiumi tuusintilikkuutaani matumani tamanna atuuppoq. Taamaattorli 1990-mi,1995-mi 1997-imilu arnat nunanut allanut nuuttut amerlanerullutik.

Nunat soqutigineqarnerpaat
Danskit nunanut allanut nuukkaangata ungasissumut nuunneq ajorput.

Amerlanerpaat Tuluit Nunaannut nuuttarput. Danskit 2179-t Tuluit Nunaannut nuupput 2014-mi.

1861-tit Kalaallit Nunaannut nuupput, USA-mullu danskit 1852-it nuullutik. Taakkununnga tullinnguupput Sverigemut, Norgemut, Tysklandimut Savalimmiunullu nuuttut.

Syriamiut 5401-it Danmarkimut nunasipput 2014-mi. Danskit marluinnaat Syriamut nuuttut.

Danskit 196-t nalunaarutiginngilaat sumut nuunnerlutik.

20-nit 29-nut ukiullit amerlanerpaapput nunanut allanut nuuttut. Taamatut ukiullit 8113-t nunanut allanut nuupput. Nunanut allanut nuuttut 40,3 procenteraat.

Aamma taamatut ukiullit Danmarkimut nunasisut amerlanersaapput.

Allamiut amerlasuut aallartut
Nunamit allameersut 29.095-t Danmarkimi najugaqarunnaarput. Kisitsit aatsaat taama angitigaaq.

Inuit katillugit 49.218-t Danmarkimi najugaqarunnaarput.