Danmark VM-ertoqarnissaanik pissaganarluinnartumik misilitsissaaq

Arsaattarfik Podgorica isiginnaartarfimmiit naqqa tikillugu, qallunaat sisamanngornermi VM-imut Montenegrolu anngunniuffigisassaat, qassutaaasalersugaavoq.

Montenegromut ingasattajaartumik illersuisartoq ukiut marluk matuma siorna Ruslandimut unamminermi raketsimik russit målinik illersuisuat eqqormagu unammineq pisuulluni unammineq unitsinneqarpoq kingornalu taamaatinneqarluni.

Montenegro 0-3-mik ajorsartinneqarpoq, tamatumalu kingorna unammisartut arsaattarfimmiittut kanngunartuliorfigineqaqqinnginnissaat anguniarlugu qassutaasarujussuit ikkussorneqarsimapput.

2015-imi pisoq qallunaat misigisinnaalluaraat, qallunaaq nunanut allanut unammisartoq William Kvist isumaqarpoq.

- Ilisimareernissaa pingaaruteqarpoq. Ikkussuisoqarsimavoq Superligami misilittarneqarpiarneq ajortumik. Arsaattarfimmiinneq ilungersunarnerullunilu sukataarfiunerussaaq, taanna oqarpoq.

Amerlassusaat ernumalersitsisuunngillat. Arsaattarfimmut aserfallassimaqisumut isiginnaariat katillugit 11.000 eqqartorneqarput.

Balkanimiliuna tusaamaneqaataalluartumik nipimik pilersitsisarnerat pineqartoq.

Montenegrollu unammersuarnernut aatsaavissuaq taamak periarfissagissaartiginera arsaattarfimmilu isiginnaariat titarnerup killigaaniit meterialunnuanit issiasut imaannaanngeqaat.

Oqariartaaseq ”arnaqquassaap igarsua” atussallugu tulluarpoq.

- Qanittuararsoorpasipput, taamaammat arsaattarfiup qeqqani unammisarama nuannaarutigaara, William Kvist illarluni oqarpoq.

- Arsaattarfiarannguuvoq nuannerluinnartoq, naalagaaffiillu tulluusimaartup periarfissaq takusinnaappagu, taava isiginnaariat soorunami unammisartuutitik illersorluarumallugit nipituuliussaqaat, taanna oqarpoq.

Montenegro anngunniunnerit aallartilluartarsimavai, unamminerillu aalajangiisut ingerlanneqaleraangata ingerlanerlulertarlutik.

Maannakkut naalagaaffeeraq 700.000 missarluinnaanik innuttaasulik VM-imut anngunniunnermi naggatissaa tikillugu periarfissagissaarput.

- Akunnittarfitsinni angut naapippara taassuma oqaatigaa Jugoslaviap kingorna aatsaat, Montenegro anngutilertoq.

-Qulassangaluaruttalu ilisimassavarput piumassuseqarluinnartunik unammisassaqaratta, nunut allanut unammisartoq Thomas Delaney oqarpoq.

Isiginnaartut sapinngisartik tamaat qallunaanik ernumatitsiniarsarinerini, hjemmebanertut unammisartuinut apeqqutaalissaaq, VM-ernissaq ungasitsorsuujunnaarneranut apeqqut.

- Inuit aallussilluarlutillu nakkutiginnillualeraangamik qanoq iliuusissaarussinnaasarput. Manna periarfissarilluarpaat, nukinnillu tunineqarluarsinnaapput kisianni aamma qanoq iliuusissaaleqilersinnaalluarlutik, William Kvist oqarpoq.

Unamminissaq siulinnguani Montengro Danmarkilu gruppimi aappaattut pingajuattullu inissisimapput. Holdit tamarmik siuttuusut Polen pointinik pingasunik inorsaatigaat.

/ritzau/