Danmark Armeniami eqqarsarluartariaqarpoq

Ukiarmanna Danmark VM-imut anngunniunnermi ilungersungaatsiarpoq.

Danmarki ukiup tulliani Ruslandimi VM-ernissamut peqataaniarluni neriuuteqassanguni, unamminerit sinneruttut pingasut ajungaasariaqarpasippai.

Taamaammat tallimanngormat Polenimut 4-0-mik ajugaaneq, ataasinngornermi Armeniamut unamminermi ajungaasariaqarpaat.

Nunanut allanut unammisartunut sungiusaasup Åge Hareidep Polenimut unamminermisuulli piumassuseqarluarnissaq piumasaraa.

Unammisartut ullualunnguit ingerlanerini unammisarnissaannut timikkut akornutaanavianngitsoq norgemiup naatsorsuutigaa. Eqqarsataatsikkulli unammilligassaq annertunerusoq, taanna isumaqarpoq.

- Eqqarsartaaseq ernumassutigineruara. Unammeqqinnissamut eqqarsartaatsikkut piareersimasariaqarpugut. Tamanna pingaarnersaavoq. Taamaaliorutta, iluarisimaassaanga.

- Eqqarsartaaseq atorsimasarput attatiinnassavarput. Unammissutigeqqissavarput. Tuaviupilussinnaanngilagut, Hareide oqarpoq.

Manchester Unitedimi unammisartoq Henrikh Mkhitaryan Danmarkip paarisassaasa ilagaat.

- Parkenimi unamminitsinniit Armenia unammisartunik allannguuteqangaatsiarsimanngilaq. Toqqangassaqarpallaanngillammi.

- Henrikh Mkhitaryan sillimaffigissavarput, taanna Premier Leaguemi arsallaqqissuuvoq, sungiusaasoq oqarpoq.

Mkhitaryanip ukioq manna Unitedimut aallartilluarsimanera, Christian Eriksenip maluginiarsimavaa.

- Henrikh aallartilluaqaaq. Manchester Unitedimut pingasoriarluni arsaqataanermini tallimanik assisteqarpoq arsarluartaaqalunilu. Taanna imminut tatigeqaluni unammeqataassaaq, kisianni Unitedikkut arlariinnik unammillaqqissunik arsaattartoqarput.

- Armeniamut unammitsinni Polenip unamminerasuulli unammissuugut, tassami taakku ataatsimik pikkorissortaqarput paariniangassatsinnik, Tottenhamimi unammisartoq oqarpoq.

Danmarkip Armeniamut unamminera danskit nalunaaqutaat malillugu 18.00 aallartissaaq.

/ritzau/