Oqaatsit
D: Sulinerup nalaani kalaallisut ilinniartoqarli
Inersimasunut kalaallisut ilinniartitsinerup nukittorsarnissaa Inatsisartut oqaluuseraat
Nunatta avataani inunngortut kalaallit oqaasiinik ilikkarniaasaartarnerat Inatsisartut oqaluuseraat. Demokraatit siunnersuutigaat sulinerup nalaani kalaallisut ilinniartoqartassasoq. Sulisitsisut akisussagatippaat.
Demokraatit siulittaasuat Anda Uldum apeqquteqaat tunngavigalugu inersimasut kalaallisut ilinniartalernissaannik oqallisiginninnissamik siunnersuuteqartuuvoq.
Inuit ikittuinnaat nunatta avataani inunnogrtut kalaallisut ilikkartarput ilarpassuilu ukiorpassuit nunatsinni najugaqartarput kalaallisut ilikkaratik.
Anda Uldum siunnersuuteqarpoq kalaallisut ilinniartitsineq sulinerup nalaani pisalissasoq. Ilanngullugu siunnersuutigaa kalaallisut atuartitsineq pitsanngorsarniarlugu periutsit allat misissuataarneqassasut. Anda Uldumip aamma kaammattuutigaa allamiut oqqarliorsinnaanerat akuersaarneqartariaqartoq.
Oqallinnissaq sioqqullugu oqaluuserisassaq Naalakkersuisut sulisitsisunut isummersorfigitissimaaat. Sulisitsisut sulinerup nalaani kalaallit atuartitsisarnissaq akisussangatippaat.
- Pisortat aqqutigalugit oqaatsinik pikkorissarnissamut tapiiffigineqarnissamut periarfissaqarpoq. Naalakkersuisut aamma sulissutiginiarpaat kalaallisut ilinniartitsinerup ataavartumik nalilersortuarnissaa saaffigineqartunullu naleqqussartuarnissaa, ilinniartitaanermut, ilagiinnut, kulturimut naligiissitaanermullu naalakkersuisoq Nick Nielsen akissuteqaammini allappoq.
Taassuma aamma taperserpaa nunatta avataaneersut kukkulaartarsinnaanerisa akuersaarneqarunissaanik Anda Uldumip inassutaa.
- Piumassutsimut pingaarutilerujussuuvoq kalaallisut allamiutullu oqaatsit ilinniarneranni ikioqatigiinnissaq. Aamma pingaarpoq eqqaamassallugu kalaallit inuiaat illarumatuujusut, Nick Nielsen oqarpoq.
Apeqquteqaat tunngavigalugu oqallinnissamik siunnersuut Inatsisartut marlunngornermi ualikkut oqaluuseraat.