Aleqap atornerluinera
D: Siumup Aleqa Hammond siuttoralugu piginnaatitaaneq sumiginnarpaa
- Partiip aningaasaatai nunattalu aningaasaatai Siumup immikkoortikkuminaatsittuarsimavai. Taamaammat Aleqa Hammondip pisortat aningaasaataannik atornerluisimaneranik qulaajaaneq Demokraatit sunnguamilluunniit tupaallaatiginngilaat, Anda Uldum oqarpoq
Naalakkersuisut siulittaasuata Aleqa Hammondip nunatta karsianit 106.363,27 koruuninik aningaasanik atuisimanera Demokraatinit tupaallaatigineqanngilaq.
- Partiip aningaasaatai nunattalu aningaasaatai Siumup immikkoortikkuminaatsittuarsimavai. Ajoraluartumillu tamanna partiimi ileqquulersimagunarpoq imaaliallaannaq piigassaanngitsoq. Taamaammat Aleqa Hammondip pisortat aningaasaataannik atornerluisimaneranik qulaajaaneq Demokraatit sunnguamilluunniit tupaallaatiginngilaat. Oqartoqarsinnaavormi partiimi ileqqui maliinnarai, Demokraatit siulittaasuat Anda Uldum tusagassiutinut nalunaarummi oqarpoq.
Aningaasaliisussat
Anda Uldumip pisoq 'alianartutut oqaatigaa, Siumummi nunatta isigineqarneranik ajoquseereerneranik asuli ajornerulersitsiinnarmat.'
- Siumup Aleqa Hammond siuttoralugu piginnaatitaaneq qinersisartunit 2013-imi tunniunneqartoq sumiginnarpaa. Ajoraluartumillu mamianartuliornerpassuit nunatta avataani aamma maluginiarneqarput, nunattalu naalakkersuinikkut aqunneqarnera pissutigalugu aningaasaleerusussinnaasunik qimaatitsisimanissaa qularutiginngilara. Tamanna assut uggornarpoq, Anda Uldum oqarpoq.
Siullermiilinngilaq
Inatsisartunut qinersinissaq sioqqullugu saqqummiunneqarpoq Aleqa Hammond pisuni arlalinni nammineq aningaasaatiginngisaminik ajornartorsiuteqartarsimasoq. Berlingske Tidendemi qulaajaanerup kingorna Siumup siulittaasuata nassuerutigaa 1995-imi mrsimi apriilimilu arfineq-marloriarluni dankorti atornerluttarsimallugu Hotel Godthåb-imi 5.1000 koruuninut pisinermut. 2008-mi aningaasaqarnermut nunanullu allanut tunngasunut naalakkersuisuugallarami aalakoorluni taxa-mut akiligassani qimarratigisimavaa.