qinersineq
D sinnerlugu qinigassanngortittoq: Takornarialerineq aningaasarsiornikkut siuariartortitsisinnaavoq
Demokraatit sinnerlugit Inatsisartunut qinigassanngortittup, Randi Vestergaard Evaldsenip takornarialerineq ineriartortikkusuppaa
Islandimi takornarialerineq ineriartupiloorpoq ukiuni kingullerni. Takornarialerineq Islandimut aningaasatigut isaatitsiffiunersaavoq - ilaatigut aamma Berlinske allappoq Islandimi takornarissat 1 millionit tikinnissaat naatsorsuutigineqartoq. Ukioq 2000-mit sanilliullugu pingasoriaammik amerlaneruvoq.
Takornarissat 71.000-it Nunatsinnut tikipput 2013-mi.
Tamanna allisinneqartariaqarpoq.
Demokraatit sinnerlugit Inatsisartunut qinigassanngortittoq Randi Vestergaard Evaldsen taama isumaqarpoq.
- Island ajornerusumik inissisimanikuuvoq, maannakkut Kalaallit Nunaata inissisimaneranut naleqqiullugu. Takornariartitsineq Islandimi isaatitsissutini annersaavoq Islandimilu aningaasarsiorneq siuariartortilernikuullugu. Siornatigut aalisarneq pingaarnertut inuussutissarsiutaavoq soorlu nunatsinni ullumikkut taamaattoq, Randi Vestergaard Evaldsen oqarpoq.
- Island iloorraap allarnikuuvoq akiitsorpassuaqaraluarluni suli, taakkuli akilersorneqaraluartut ineriartorneq ima pitsaatigaaq – allat Island pisuunerpaanut ilaalersimalluni, pigisat inuttaasunut ataasiakkaanut agguaqatigiisikkaanni.
Islandimiut misilittagaat
- Takornariaqarneq Kalaallit Nunaanni aamma periarfissaavoq, nunat eqqaamiugut isumassarsiorfigisariaqarpagut. Island nunaavoq uatsinnut assersuulluarsinnaasarput, innuttat nunalu eqqarsaatigalguit. Neriulluarpunga nalunnginnakku nunarsuarmi takornariartitsinermi pikkorinnerpaat ilaanni sulisoqaratta aamma nalunngilara siuariarsinnaasugut, suleqatigikkutta, oqaloqatigiilluarutta aamma nutaanik eqqarsarutta, Randi Vestergaard Evaldsen erseqqissaavoq.
Nunap iluani angallannermi aamma avammut angallannermi akigitinneqartut annikillineqarnissaat oqarputit. Tamanna inuiaqatigiit iluaqutigissagaat oqarputittaaq. Akinik appaanernut kikkut akiliissappat?
- Akit annikillineqarpata takornarissat amerlanerulissapput, amerlanerusunik takornariaqalerpat isertitat amerlanerulissapput. Tamanna kikkunnut tamanut iluaqutaassaaq. Tuniniakkat pisiaasartullu naapertorlugit akit inissisimatinneqartarput. Takornarissat amerlanerusut Nunatsinnut tikittalissappata akigitinneqartut annikillineqartariaqarput, Randi Vestergaard Evaldsen oqarpoq.
Visit Greenlandip aningaasalerneqartarnera
- Suminngaannit aningaasat aaneqassappat?
- Aningaasanik aallertoqassanngilaq. Aningaasat uteqqissapput, nammineerluni ataqatigiissaaq. Island tassuuta takuneqarsinnaavoq. Takornariarpassuit tikittarput. Kalaallit Nunaanni aallartisaasoqartariaqalerpoq.
- Inuussutissarsiutinik siuarsaanermi aningaasartuutigineqartartut qanoq amerlatigisunik annertusineqassanersut naatsorsuutigisinnaaviuk?
- Visit Greenland ukiumut 16 million koruunit missaannik pissarsisarpoq. Tamanna annertusineqartariaqarpoq. Tamanna aningaasaliineruvoq avaqqunneqarsinnaanngitsoq. Inatsisartunut Naalakkersuisunullu isertussat takornariaqarneq eqqartortariaqalerpaat, Randi Vestergaard Evaldsen oqarpoq. Aamma isumaqarpoq Kalaallit Nunaanni inuussutissarsiutaareersut suli aallunneqaannassasut, tassanngaanniillu siuarsaasoqassasoq.