D: Qinersititsisoqaqqinnissaa tulluanngilaq

Partii qinersititsinissamut piareersimanngitsoq, Demokraatit siulittaasuat oqarpoq. Taamaattoq partiip aalaakkaasunik naalakkersuisoqarnissaa orniginartinneruaa.

Vittus Qujaukitsoq sapaatip-akunnerata tulliani Siumumi siulittaasunngussangaluarpat, qinersititsisoqarnissaanut Demokraatit piareersarsimapput.

- Qinersititsisoqarnissaa kissaatiginngikkaluarparput, kisianni piareersaateqarsimavugut. Tamannami pisariaqalersimavoq, partiip siulittaasua Randi Vestergaard Evaldsen Sermitsiaq.AG-mut oqarpoq.

Sermitsiaq.AG-p paasisai aallaavigalugit taakku qaammatit marluk matuma siornali piareersalutik aallartereersimapput. Taamanikkut Vittus Qujaukitsoq tapersersorluarneqarpasippoq.

- Inuk ataasiinnaq piinnarlugu Nunarput qinerseqqittarialernissaa ajuusaarnartippara, Randi Vestergaard Evaldsen oqarpoq.

- Aalaakkaasumik naalakkersuinikkut aqutsisoqarnissaa pisariaqartipparput. Ikerinnakkulli qinersititsisoqassangaluarpat nunanit allanit aningaasaliisartunut sunniuteqanngitsoorunnarani.

Siumukkormiulli siulittaasunngorniuutitsinerat naalakkersuisoqataasunit Partii Naleqqamit Inuit Ataqatigiinnillu oqaaseqarfigiumaneqanngilaq.

- Siumumi siulittaasunngorniuunneq partiimi tassaniippoq, IA-p siulittaasua Sara Olsvig oqarpoq.

Taassuma piffissami qanittumi sulinngiffeqarallarnissaa naatsorsuutigineqarpoq. Taamaattoq sulinngiffeqarallarnermi nalaani partiip siulittaasuatut ingerlaannassalluni.

- Inatsisartut ataatsimiinnerisa naammassilernerani oqaatigereerparput, aasaanerani qanorluunniit pisoqaraluarpat, ukiaanerani ataatsimiinnissamut Inuit Ataqatigiit suleqatigiinnermik pitsaasumik ingerlatserusulluta, Sara Olsvig oqarpoq.

Piffissamilu kingullermi Vittus Qujaukitsup periarfissai annikillisimarpasipput, taamaasilluni ikerinnarmi qinersinissaq ungasittutut ilersimavoq.

Siumumi nuimanerit ilaat soorlu Jørgen Wæver Johansenip aamma Hermann Berthelsenip ersarilluinnartumik Kim Kielsenimut tapersersuinertik nalunaarutigisimavaat. Taamaattoq siulittaasunngorniuunnermi sinerissami immikkoortortaqarfiit aalajangiisuussaapput.

Vittus Qujaukitsorluunniit siulittaasunngorniuunnermi ajungaassangaluarpat, qinersititsisoqassanersoq Kim Kielsenip aalajangingassaraa. Tassami Naalakkersuisut siulittaasuat kisimi qinersinissamik aalajangiisinnaatitaavoq.

- Qinersitisinissamut apeqqut oqaaseqarfigissanngilara, Kim Kielsen Sermitsiaq.AG-mut oqarpoq.

Vittus Qujaukitsorli ajungaassangaluarpat, Kim Kielsen naalakkersuisoqatigiinnit siuttutut ingerlaannarsinnaavoq. Taannali aamma qinersinissamik aalajangiinngikkaluarluni Naalakkersuisut siulittaasuatut tunuarsinnaalluni.

AAMMA ATUAKKIT:

Hermann Berthelsenip qinersititsinissaq mianersoqqussutigaa

Vittus: Siulittaasunngorniunnermi ajugaaguma qinersisoqassaaq

Powered by Labrador CMS