Naligiissaarineq
D: Naligiissaarinissap Siumukkormioqarfiit kisiisa iluaqusissavai
Demokraatit siulittaasuat Anda Uldum uppernarsaatissanik nassuiaammillu piumasaqarpoq naligiissaarinermut Naalakkersuisut siunnersuutaat pillugu
Demokraatit siulittaasuata Anda Uldumip Naalakersuisut pasillerpai naligiissaariniarneq nutaaq atorlugu nunap ilai Siumukkormiunik taasisartoqarluartut kisiisa iluaquserniarnerarlugit. Anda Uldumip aarleqqutigaa naligiissaarinermi iluarsaaqqinnerup nunatsinni saannginnerusoqarfinnik eqqornerluinissaa.
Naliigissaarinissamut siunnersuut Naalakkersuisut saqqummiunnikuuaat Kommuneqarfik Sermersuumilu naatsorsuinerit malillugit aningaasat 56 millioner koruunit Kommuneqarfik Sermersuumiit peerniarneqarput. Aningaasat taakku nuunneqarnissaat akuerineqassappat Qaasuitsup Kommunia aamma Kommune Kujalleq pissarsisuussapput.
Sanngiinnerit eqqussavaat
- Naalakkersuisut nalimmassaanerup ilusissaatut siunnersuutaat sumiiffiit Siumumik qinersisartoqarfiunerpaasut iluaqusersornissaannik siunertaqaannarunarpoq, Anda Uldum oqarpoq.
Taanna paragraf 37 naapertorlugu Naalakkersuisunut apeqquteqarpoq paasiniarlugu sooq Naalakkersuisut Kommuneqarfik Sermersooq Nunatsinni kommunini piitsuunerpaanngortinniarnerat aningaasat inuttaasunut agguataarlugit naatsorsoraanni. Taassuma pingaartumik aarleqqutigaa tunu aamma Kommuneqarfik Sermersuumut atasoq sakkkortuumik eqqugaassasoq.
- Naalakkersuisut taamatut siunnersuuteqarnerisigut tunu – nunatsinni sumiiffiit inooqataaniarnikkut aningaasatigullu sanngiinnerpaat ilaattut taasariaqartoq – kiffartuussinikkut ajorseriaatinik eqqorneqartussaavoq. Tamanna naammaqatigiinnerunngilaq, taamaalillunilu aamma Naalakkersuisut inuaqatigiinnik nammaqatigiinnerusunik pilersitsinissaminnik anguniagaqarnerannut naapertuunnani, Anda Uldum apeqquteqaamminut tunngavilersuummi allappoq.
Ilimaginngilaali isornartorsiuisoqarneranut Naalakkersuisut tusaaniarnissaat.
- Sumiiffinni Siumup nukittunerpaaffiini aningaasatigut ikorfartuinissaq kisiat Naalakkersuisut eqqarsaataanniippoq, Anda Uldum oqarpoq.
Naligiissaarinermut aaqqissuusseqqinnissaq pillugu aggustip aqqarnat nallertinnagu isumaqatigiittoqarsimanissaa pilersaarutaavoq. Qeqqata Kommunia aamma Kommuneqarfik Sermersooq siunnersuutip ullumikkut isikkorisaanut akerliupput.