namminersortunngorsaaneq
D: Naalakkersuisut qanoq isillutik Royal Greenland namminersortunngorsarniarpaat?
Royal Greenlandip namminersortunngorsarniarlugu Naalakkersuisut oqaaseqarnerat Demokraatinit nuannaarutigineqarpoq. Naalakkersuisullu eqqortunik patsiseqarnersut, Demokraatit ernumassutigaat.
Aalisarnermut Naalakkersuisup Hans Enoksen (PN), Royal Greenlandi namminersortunngorsarusukkaa Sermitsiaq.AG-p allaaserisimavaa.
Oqartiartuulli assigiinngitsuni isummerfigineqarpoq. Royal Greenlandip namminersortunngorsarneqarnissaa KNAPK-mit isumaqataaffgineqarpoq SIK-li isumaqataanani.
Atuaruk: Royal Greenlandip namminersortunngorsarnissaa Naalakkersuisut oqaluuseraat
Pissutsit qanoq pitsanngorsarneqassappat?
Demokraatineersut Randi Vestergaard Evaldsen Michael Rosingillu, Hans Enoksenip oqariartuutaa nuannaarutigalugu allapput.
- Ilimagivallaanngilarpulli Naalakkersuisut pissutsit eqqortut tunngavigalugit taamaaliorniartut. Sualummik ernummatigaarput Naalakkersuisut iliuuseriniagaat, Demokraatit Inatsisartuni ilaasortaatitai oqarput.
Partiimit naammagittaalliutigineqartut ilagaat Royal Greenland ikippallanik kalaallinik aqumioqarnera.
- Isumaqarpugut Kalaallit Nunaanni ilinniartitaanerup qaffasissusaa pissutaanerusoq Royal Greenlandiunngitsoq. Kisianni Royal Greenland namminersortunngorsarneqarpat tamanna qanoq ililluni pitsaanerulissanersoq eqqoriarsinnaanngilarput, Michael Rosing Randi Vestergaard Evaldsenilu oqarput.
Atuaruk: Royal Greenlandip namminersortunngorsarneqarnissaa SIK-mit isumaqataaffigineqanngilaq
Aaqqiissutaanngitsoq
- Alla Naalakkersuisut ajornartorsiutaasorisaat Roayl Greenlandip namminersortunngorsarneqarneratigut qaangerneqarsinnaasorisaq tassaavoq naapertuutinngitsumik niueriaaseqarnertut oqaatigineqartoq qaleralinnik akitsortitserujussuartoq.
- Assortorsinnaanngilarput naapertuutinngitsumik unammilleqatigiittoqarsinnaanera, kisianni tamatumannga suliaqartussaavoq Unammilleqatigiinnermut Aqutsisoqarfik. Tamatuma kingorna misissorneqassaaq unammilleqatigiinnermut inatsit iluarsineqarsinnaanersoq taamatut pisoqaqqeqqunagu. Kisianni suli nassuiaanneqanngilagut Roayl Greenlandimik namminersortunngorsaanerup qanoq ililluni ajornartorsiut tamanna qaangiutsissinnaaneraa. Suliffeqarfik Royal Greenlanditut angitigisoq naapertuutinngitsumik unammilleqatigiinnermik pilersitsisinnaavoq kimilluunniit pigineqaraluaruni.
Atuaruk: Royal Greenlandip namminersortunngorsarnissaa unammillertaanit taperserneqarpoq
Paasititsiniaanikkut tunngaveqassaaq
Kiisalu naggataatigut Demokraatit ernummatigaat Roayl Greenlandimik namminersortunngorsaaniarnerup tassaasinnaanera piffissaq qaninnerusoq isigalugu landskarsimi amingartoorutinik matusiniarneq.
Aalajangiinerit angisuut soorlu Royal Greenlandimik namminersortunngorsaanissat, aalajangerneqartariaqartut suna tamaat paaseqqaarlugu Naalakkersuisut uumitsannerat pissutigiinnarnagu. Tassunga atatillugu oqarusuppugut, Naalakkersuisut peqquneqarnikuummata namminersorlutik oqartussat suliffiutaat tamakkiisumik ilaannakoortumilluunniit pisortanit pigineqartut namminersortunngorsarneqarnissaannut misissueqqissaaqqullugit, Michael Rosing Randi Vestergaard Evaldsen (D) oqarput.
Nassuiaat taanna saqqummiuteqquneqarnikuuvoq kingusinnerpaamik 2018-mi ukiakkut ataatsimiinnermi. Siunnersuutigissavarput Naalakkersuisut nasuiaasiussatut taannalu siunissami namminersortunngorsaanerni tikkuutitut atorlugu, maannakkutut isumakasiit aalanerat tunngavigalugu namminersortunngorsaasarata.