ataatsimiititsineq
D: Naalakkersuisut periusaat pissuserissaarnissamut ileqqorissaarnissamullu akerliulluinnarpoq
Naalakkersuisut Maniitsumi innuttaasunik ataatsimiisitsinerat juunip qulingiluaani pisoq suli isornartorsiorpaat
- Paasinarsivoq Maniitsumi juunip qulingiluaanni Naalakkersuisut innuttaasunik ataatsimiititsinerat kanngutsaattuliorluni aaqqissuussinerusoq taamaallaat siunertaralugu Siumup nuna tamakkerlugu ataatsimeersuarnermut atatillugu angalanermut akunnittarfimmilu ineqartitsinermut sipaaruteqarnissaa. Allamik oqartoqassappat tissinaannartussaavoq.
Demokraatit siulittaasuat Anda Uldum tusagassiutinut nalunaarummi 'Naaguna pissuserissaarneq?'-mik qulequtalersimasamini allappoq.
Paragraf 37-mik apeqqutai Naalakkersuisut siulittaasuannit Aleqa Hammondimit Siumumeersumit akineqareernermi kingorna taama allappoq.
- Inatsisitigut kukkuluttortoqarsimanngilaq, Naalakkersuisulli periusaat pissuserissaarnissamut ileqqorissaarnissamullu akerliulluinnarpoq. Isornaatsuunissaq taamatullu landskarsip aningaasaataasa qanoq atorneqarnissaannut ataqqinninnissaq ersinngilaq, Anda Uldum oqarpoq.
- Naalakkersuisut namminneq naliliipput atuutileramilli 130-riarlutik innuttaasunik ataatsimiititsisarsimallutik. Innuttaasunik ataatsimiititsinermi ataasiinnarmi Siumut Naalakkersuisuutitai tamarmik ataatsikkut peqataapput. Suu, eqqorpat – Maniitsumi ulloq 9. juni innuttaasut ataatsimiisinneqarmata, tassani peqataanermut pissutaavoq Siumut nuna tamakkerlugu ataatsimeersuartitsineranut atatillugu ornigunnissamut ineqartinneqarnissamullu landskarsip akiliisinnissaanut utoqqatsissutissaqalerneq. Quianaannartumilli Atassutip Naalakkersuisuutitai innuttaasunik ataatsimiititsinermut peqataanngillat, Demokraatit siulittaasuat tikkuaavoq.
Periuserineqartumut isorinninneq
Ilaannit immaqa eqqarsaatigineqarpoq ullunik ataatsikkoortitsineq nalaattornerinnaasoq, kisianni 'taamaanngilluinnartoq' Anda Uldum oqarpoq.
- Innuttaasunimmi ataatsimiititsineq aatsaat aaqqissuunneqarpoq ulloq 17. marts 2014-p kinguninngua. Piffissami tassanerpiaq Naalakkersuisut arlaannaataluunniit nalunngilaat, Siumut pilersaaruteqartoq piffissami tassanerpiaq nuna tamakkerlugu ataatsimiititsiniarluni.
- Allatut oqaatigalugu, Siumup misigittaalluinnarluni pissutissarsiorsimammat aningaasartuutinik Landskarsi akiliisinniarlugu Siumup akilertariaqarluinnagaanik. Periuseq ileqqorlunneruvoq kanngunarluinnarlunilu. Uanga paasisinnaanngilara qanoq iliorlutik Atassutip Siumumilu ilaasortat kanngunartuliorneq isiginngitsuusaaginnarsimaneraat, Anda Uldum oqarpoq.