Naalakkersuisut nutaat
D: Naalakkersuisut nukillaajallaqqapput
Demokraatit Naalakkersuisut nutaat ernummatigaat, taakku ullumi nutaanik marlunnik ilaasortartaarput, tassa Erik Jensen aamma Karl Kristian Kruse, taakku Martha Lund Olsen aamma Vittus Qujaukitsoq taarserpaat.
Kalaallit Nunaat patajaatsuunissamik atajuarnissamillu pisariaqartitsisoq, partii naalakkersuisoqatigiit avataani inissisimasoq isumaqarpoq, ullumikkullu naalakkersuisunik nikisitsineq tamatumunnga takussutissaanngitsoq.
Siumimi avissaartuunneq
- Ajoraluartumilli piviusuuvoq ullumikkut Naalakkersuisugut nukillaajallannikuummata, nukittorsarneqartussat ilaasortat marluk nutaat atorfinnut pingaarnerpaanut ivertinnerisigut. Naalakkersuisuni ilaasortanik taarseeqqikkallarujaagut nunami partiit annersaanni avissaartuuttoqarnera aamma qularnanngitsumik partiip kommunini marlunni kommunimut qinersinermi kinguariarnera pissutaalluni, Justus Hansen Demokraatineersoq tusagassiuutinut nalunaarummi allappoq.
Politikkikkut aqutsisut taarseraannerujussuanni ''innuttaasunik toqqissisimajunnaartitsisoq'', partii isumaqarpoq.
D: Patajaatsuunissamik pisariaqartitsivugut
- Kalaallit Nunaata pisariaqartippaa patajaassuseqarnissaq toqqissisimannginneq ulluinnarsiutaaleqqunagu. Aamma puigussanngilagut pisut pissutigalugit nunarsuup sinneranut takutitsinigut torrallaaneruvallaanngitsut. Kalaallit Nunaata naalakkersorneqarnerani "puussiaq aalateqqinneqarpoq" tamannalu pivoq timmisartunut suluusalinnut mittarfinnik sanaartornissanut illuliortiternissanullu atatillugu namminersortut aninngaasaliisartut milliartilikkaanik aningaasaliisinnaanissaat pillugu isumaqatigiinnialeruttorfitsinni, Demokraatit siulittaasuata tullia oqarpoq.
Taamaakkaluartoq Naalakkersuisut nutaat ''iluatsitsilluarnissaannik sulilluarnissaannillu'' kissaappai, piffissaq ungasinnerusoq isigalugu sapinngisamik amerlanerpaat isumaqatigiissuteqarnissaannut atatillugu Demokraatit sapinngisartik tamaat akisussaassusilimmik ingerlasoqarnissaa qularnaarniarumaarlugu neriorsuipput.