immikkut siunnersortit
D Naalakkersuisunut: Siunnersortit atorunnaarlik
Demokraatit isumaqarput kaajallaasitap Naalakkersuisunut ilaasortat immikkut siunnersorteqarsinnaanerannut periarfissiisup atorunnaarsinnissaa Naalakkersuisut eqqarsaatigisariaqaraat
Naalakkersuisunut ilaasortanut immikkut siunnersortinik atorfinitsitsisarneq aamma aningaasarsiaqartitsarneq pillugu kaajallaasitaq, maannamut kusanaatsuliornernik marlunnik malitseqareersimasoq, isornartorsiorneqaqqippoq.
Isornartorsiuineq sakkortooq siulleq pivoq kaajallaasitap 2014-imi januaarip aallaqqataani atuutilersimatsiarnerata kinguninngua. Taamani saqqummerpoq Naalakkersuisut siulittaasorisimasaata, Siumumeersup Aleqa Hammondip inooqataa taamani aalisarnermut, piniarnermut nunalerinermullu naalakkersuisuusumit kaajallaasitap atuutilitsiarnerani atorfinitsinneqarsimasoq.
Kaajallaasitamut maanna isornartorsiuineq Naalakkersuisuutitaqartunit saqqummerpoq.
Demokraatit Inatsisartuni ilaasortaatitaa, Randi Vestergaard Evaldsen, kaajallaasitamut Siumumeersup Karl Lyberthip Naalakkersuisut aamma Siumup siulittaasorisimasaata inooqataanik Tom Ostermannimik immikkut siunnersortissaminik atorfinitsitsisimasoq saqqummiunneqareersorlu, aalisarnermut, piniarnermut nunalerinermullu naalakkersuisuuneranik naleqartumut, apeqquteqaateqarpoq.
Kaajallaasitami pitsaaqutit tusaruppaat
- Naalakkersuisunut ilaasortat immikkut siunnersortaannik atorfinitsitsisarneq akissaateqartitsisarnerlu pillugit kaajallaasitaq 1. januaari 2014-meersup attatiinnarnissaa Naalakkersuisut sutigut iluaqutissarsivigisarpaat, ersarissumik malunnarmat naalakkersuisoqatigiinni partiit annersaasa marluk immikkut siunnersortinik atuisinnaaneq atorusunngikkaat?
Taama Demokraatineersoq Randi Vestergaard Evaldsen Naalakkersuisunut paragraf 37 najoqqutaralugu apeqquteqaateqarpoq.
Randi Vestergaard Evaldsenip aamma ilanngullugu tusarusuppaa Naalakkersuisut eqqarsaatigisinnaaneraat kaajallaasitap pineqartup atorunnaarsinnissaa.
Isertortumik tapiissutitut suli isigaat
Tamanna pivoq Naalakkersuisunut ilaasortat immikkut siunnersortaannik atorfinitsitsisarneq akissaateqartitsisarnerlu pillugit kaajallaasitaq 1. januaari 2014-meersoq sakkortuumik Demokraatinit isorineqarmat.
- Tamatumunnga pissutaavoq isumaqaratta tamanna isertortumik partiinut tapiisarnertut isigisariaqartoq, naalakkersuisoqatigiinni partiit kisimik iluaquserneqartarmata aamma illuatungiliuttut immikkut siunnersortinik atorfinitsitsinissaminnut periarfissaqanngimmata, Randi Vestergaard Evaldsen apeqquteqaatini ilaatigut taama itisilerpaa.
Imalu nangippoq:
Atorfillit siunnersortaanissaminnut piukkunnartut
- Demokraatini tamanna tunngavigalugu iluarisimaarpaat, Siumup Demokraatillu Naalakkersuisuni ilaasortaatitaasa aaqqissuussineq atorusunngimmassuk aamma tamanna tunngavigalugu isumaqarpugut kaajallaasitap atorunnaarsinnissaa Naalakkersuisut eqqarsaatigisariaqaraat.
Randi Vestergaard Evaldsenip tunngavilersuutaai naapertorlugit Demokraatit isumaqarput Namminersorlutik Oqartussani atorfillit Naalakkersuisunut siunnersortaanissaminnut piukkunnarluartut.
Pinngortitamut, avatangiisinut inatsisinullu atuutsitsinermut naalakkersuisup politikkikkut siunnersortaa, Gerth Platou Jacobsen, ingerlaannartumik atuutilersumik kingullermik suliunnaarpoq Aasianni politiini pisortaanermi nalaani sakkortuumik nakuusersimasutut 2010-mi eqqartuussaasimanini qaqilerneqareersorlu.
Maannakkut Naalakkersuisuutitaqartuni partii Atassut Naalakkersuisuni ilaasortaatitaqartuni kisimiilluni, naalakkersuisuutitai Knud Kristiansen aamma Mala Høy Kuko, kaajallaasitaq taanna najoqqutaralugu immikkut siunnersortimik atuiniarlutik aalajangersimapput.
Naalakkersuisut siulittaasuat killiligaanngitsunik amerlassusilikkanik siunnersorteqarsinnaatitaasoq, Naalakkersuisunut ilaasortat ataatsimik siunnersorteqarsinnaatitaapput.