Inatsisartut

D: Naalakkersuisoqatigiinneersut amerlavallaanik apeqquteqartarput

Ilaannikkut allaaneq ajorpoq apeqqutit ilaat apeqqutigineqartartut tusagassiutinut tusaqqusaaginnarluni, Demokraatit oqarput.

Naalakkersuisoqatigiinneersut Naalakkersuisunut amerlavallaanik apeqquteqartartut, Demokraatit isumaqarput.

- Maannakkorpiaq naalakkersuisoqatigiinnit partiinit apeqqutigineqartartut amerlavallaarujussuarput.

Michael Rosing Randi Vestergaard Evaldsenilu Demokratineersut oqarput.

Isumaqaraluarpummi illuatungiliuttunut taamaallaat sakkuusariaqaraluarpoq.

Ilaannikkut allaaneq ajorpoq apeqqutit ilaat apeqqutigineqartartut tusagassiutinut tusaqqusaaginnarluni, akissutissat nassaarineqarsinnaasarmata Googlemi ujarlitsiarnerinnakkut, Aningaasanut Inatsimmi imaluunniit Inatsisartoqarfimmi ataatsimiititaliamut attuumassuteqartumut allatsimut saaffiginnilaarnikkut. Taamaattumik isumaqarpugut oqarsinnaalluta § 37 naapertorlugu apeqquteqarsinnaatitaaneq ilaatigut atornerlunneqartartoq, taakku tusagassiuutinut nalunaarusiamminni erseqqissaapput.

Naalakkersuisooqatigiit Naalakkersuisunut attaveqariaannaasut

Tamatuma saniatigut Demokraatinut pingaaruteqarpoq oqaatigissallugu Naalakkersuisunut apeqquteqarsinnaatitaaneq illuatungiliuttunit taamaallaat sakkutut atorneqartariaqaraluartoq, gruppini ataasimiinnerni Naalakkersuisunik akornatsinniittoqarneq ajormat.

- Taamaallaat partiini naalakkersuisuutitaqartuni taamatut pisoqartarpoq. Taamaattumik ingasattajaarneruvoq partiit naalakkersuisuutitaqartut 2017-mi Naalakkersuisunut apeqqutit 66 procentii apeqqutigisimammatigit, Michael Rosing Randi Vestergaard Evaldsenilu tikkuaapput.

Demokraatini isumaqarpugut § 37 naapertorlugu apeqqutit akinissaannut nukiit amerlavallaat atorneqartartut aamma taamaattumik siunnersuutissaqarpugut qanoriliorutta apeqqutit ikilisissinnaanerlutigit:

  • Politikerit partiinit naalakkersuisuutitaqartuninngaanneersut pikkorinnerusariaqarput Naalakkersuisunut toqqaannartumik apeqquteqarnissaminnut soorlu gruppit assigisaasalu ataatsimiinneranni.
  • Inatsisartut Siulittaasuat apeqqutit pitsaassusissaannut piumasaqarnerusariaqarpoq apeqqutillu unitsittarlugit takuneqarsinnaangaangat Inatsisartunut ilaasortap nammineq akissutissaq nassaarisinnaagaa soorlu googlemi ujarlerluni imaluunniit Aningaasanut Inatsimmik qupperaalaarnikkut.
  • Naalakkersuisut pisinnaatitaasariaqarput Aningaasanut Inatsimmi kontomut innersuussiinnarnissaminnut imaluunniit nittartakkamut takisuumik nassuiaasiunngikkaluarlutik imaluunniit itisiliinngikkaluarlutik.

- Taamaattumik aap; Demokraatini Inatsisartuni ilaasortat § 37 naapertorlugu apeqquteqarsinnaanerat tamakkiisumik taperserparput peqataanilli aamma isumaqarpugut apeqqutit pitsaassusissaannut piumasaqaateqarnerusariaqartugut nukiit piffissarlu atulussinnaqqunagit apeqqutinut, Inatsisartuni ilaasortat namminneq piumagunik akissutissarsisinnaasaraluannut.

Powered by Labrador CMS