D: Meeqqat atuarfiat malersorunnaarniarsiuk

- Ukiuni amerlavallaalersuni oqaatigineqartuarpoq meeqqat atuarfiata pitsaanngippallaartoq aamma atuartut pikkkorluppallaartut. Demokraatini isumaqarpugut piffissanngortoq paasissutissat qissiminnissaat takussagatsigu meeqqat atuarfiat annertigut ingerlalluartoq paarlattuanik angajoqqaat qiviartariaqarpagut taakku ilaat ilungersornerusariaqarmata qitornatik angusaqarluarneroqqullugit.

Inatsisartunut Kommuneqarfik Sermersuumilu kommunalbestyrelsimi ilaasortaq Anda Uldum Demokraatit oqarpoq.

- Takorluullatsialaariartigut tamatta qitornatsinni kajumissaarinerunissarput tapersersuinerunissarpullu ilaatigut qitornagut oqaluttuuttarlugit: 'sapinngilatit', 'ajukkunnanngilatit', 'upperaatsigit', minnerunngitsumillu 'ajunnginnerpaamik perusuppatsigit aamma tapersersorpatsigit'. Demokraatini qularinngilarput angajoqqaarpassuaqartoq qitornaminik kaammattuisunik tapersersuisunillu qulaani taaneqartutut.

- Ajoraluartumilli kisitsisit takutippaat suli angajoqqaat amerlanerusut akisussaanerusariaqaraluartuq meeqqamik ilinniaqqinnissaat qularnaarniarlugu. Efterskolemi, GU-mi, inuutissarsiutinut ilinniarfimmi allaqqinnaamiluunniit, Anda Uldumillu Kommuneqarfik Sermersooq assersuuppaa:

Kommuneqarfik Sermersuumit assersuut
- Tassani inuusuttut sullitat (siornatigut ingerlaqqinngitsoorsimasutut pineqartartut) appartinneqarnikuupput 2010-mi 53 procentiniit 44 procentinut 2012-mi. Tamanna kusanarpoq sulili amerlavallaarput.

- Kommuneqarfik Sermersuumi meeqqat atuarfianni soraarummeertut nukittuutut imaluunniit pikkorissutut nalilerneqartartut 2010-mi, 2011-mi 2012-milu alaakaapput 90 procentit missaaniittarlutik. Tamannaluunniit tunngavigiinnarlugu ajorpoq ukioqatigiinni inuusuttut ingerlaqqinngitsoortartut 44 procentiummata. Tassanilu Demokraatini isumaqarpugut angajoqqaat qitornamik ilinniaqqinnissaannut akisussaassuserusariaqartut. Angusaqarusussuseqannginneruvallaaqaaq qitornaq meeqqat atuarfianni angusarissaarsimasoq kaammattoreneqarneq ajormat ilinniaqqullugu, Anda Uldum tusagassiutinut nalunaarummini allappoq.

Eqqartueriaaseq allanngortinneqassaaq
Demokraatit isumaqarput akuerineqarsinnaanngitsoq meeqqat atuarfiata taama sivisutigisumi pisuutinneqartuarsimanera, eqqartueriaaseq qimattariaqartoq isumaqarlutik.

- Tamanna tunngavigalugu sakkortuumik angajoqqaat kammattorniarpagut meeqqatik oqaluttuuttassagaat ilinniarnerup pingaassusianik. Ajorpoq inuusuttut taama amerlatigisut ingerlaqqinngitsoortarmata naak meeqqat atuarfiani atuartut 90 procentii soraarummeeraangamik angusarissaartaraluartut.

- Inuiaqatigiit ilinniarsimasunik amingaateqarput – allali pingaarnerpaaq tassaavoq meeqqat ataasiakkaat periarfissarissaarnerulersarmata ilinnialersimagunik. Taamaattumik angajoqqaat eqiiganerusariaqarput qitornatillu sapinngisamik pitsaanerpaamik periarfissaqarnissaannut suleqataallutik, Anda Uldum oqarpoq.