D Kalaallit Nunaata USA-mi aallartitaqarfissaa pillugu paasissutisseeqqusisoq

Demokraatini uggoraarput Naalakkersuisut aallaqqaataaniilli, danskit aallartitaqarfianni kalaallip sulilersussap suliassai pillugit ammasumik unneqqarissumillu oqalussimanngimmata. Uagut isumaqaleraluarpugut – aammali qularnanngitsumik innuttaasut tallimanngormat isumasioqatigiinnissaq tikillugu isumaqaleraluarput – immikkut aallartitaqarfiliortoqalersoq, paasinarporli taamaanngitsoq.

Inatsisartunut ilaasortaq Anda Uldum Demokraatit oqarpoq.

Dansk Folkepartiip Kalaallit Nunaata Washington D.C-mi aallartitaqarnissaa pillugu isornartorsiorpaa. Partiip isornartorsiuinera pillugu Folketingimi tallimanngormat isumasioqatigiinneqarpoq, tassani nunanut allanut ministeri Martin Lidegaard Radikale Venstre-neersoq isumasioqatigineqarluni. Tassanilu naqissuserneqarpoq nunatta aallartitaqarfissaat Danmarkip Washington D.C-mi aallartitaqarfiannut attuumassuteqassasoq.

Kalaallit Nunaata aallartitaqarfissaa nammineq suleriuseqassanngitsoq nunanut allanut ministerimit naqissuserneqarpoq.

- Demokraatit isaannik isigalugu malunnarpoq Kalaallit Nunaat danskit aallartitaqarfianni sulisortaalersoq, niuernermut aningaasarsiornermullu tunngasunik suliaqartussamik, qularnanngitsumik iluaqutaasussamik. Paarlattuanilli ilimananngilluinnarpoq oqaatigineqaraluartutut immikkut aallartitaqarfiliortoqalersoq nunanut allanut tunngatillugu nammineq aalajangiisinnaasussamik, Anda Uldum oqarpoq.

Inatsisartut suleriaasianni paragraf 37 naapertorlugu Anda Uldum Naalakkersuisunut ima apeqquteqarpoq:

• Naalakkersuisunut nassuiaqquneqarpoq Washington D.C-imi kalaallit aallartitaqarfittaassaat pillugu Kalaallit Nunaat Danmarkilu sunik isumaqatigiissuteqarsimanersut. Naalakkersuisunut aamma nassuiaqquneqarpoq aallartitaqarfeqarneq qanoq akeqartussatut naatsorsuutigineqarnersoq kiisalu aningaasat sumorpiaq atorneqassamaarnersut.

• Naalakkersuisut uppernarsarsinnaanerlugu Washington D.C-imi kalaallit aallartitaqarfiata taamaallaat takutinniaraa Kalaallit Nunaat danskit Washington D.C-imi ambassadeqarfiani namminerisaminik sulisoqartoq sulisorlu taanna sutigut tamatigut danskit ambassadeqarfiannit oqartussaaffigineqartussaasoq?

• Suna pissutaava Naalakkersuisut isumaqalersitsiniarmata Washington D.C-imi aallartitaqarfittaassaq immikkoortuusoq nammineq aalajangiisinnaalluni?