Inatsisartut
D: Ineqarnermut akiliut akissarsinermi akilerneqartassaaq
Ullormi akissarsiffiusumi ineqarnermut akiliut akilerneqartalissappat, Demokraatineersup Justus Hansenip arlalinnik iluaqutissartaqarnerarpaa
Innuttaasut akissarsitillutik ineqarnermut akiliisassapput.
Justus Hansen (D) taama siunnersuuteqarpoq, siunnersuut ullumi pingasunngornermi Inatsisartuni siullermeerneqassaaq.
Taassuma attartornermut peqqussut allanngortinniarpaa, taamaalilluni ineqarnermut akiliut bankip qaammatini ulloq ammaffiani kingullermi akilerneqartalerluni, ullumikkut kingusinnerpaamik akiliiffissap kingulliup qaangiunnerata kingorna ulluinnaat pingajuanni akilerneqarsimassasut peqqussutaavoq.
Atuaruk: Akiligassat akilinngitsuukkat 36 procentimik qaffassimasut
Akiligassat pinngitsoortinneqassasut
Justus Hansen siunnersuuteqarnermini iluaqutissanik arlalinnik taakkartuivoq.
- Siunnersuutip uuma siunertaraa innuttaasut akiligassatigut kinguaattuunnginnissaat, taanna siunnersuummini allappoq.
- Aappaattut attartortitsisut pisortaqarfinnit namminersorlutillu inissiaatillit piffissaq eqqortoq pissarsiassartik pisassammassut taamaattumillu akileeqqusissutit allallu kinguaattooqqassutinut aningaasartuutit annikillissallutik, taanna erseqqissaavoq.
Atuaruk: Amerlanerusut akiitsutik akilertalerpaat
Akiligassat annertuallaartut
Inatsisartunut qinikkap oqaatigaa, una siunnersuut pisortanut akiligassat amerliartunnginnissaanut iluaqutaasasoq.
- Isertuussassaanngilaq innuttaasut pisortanut akiitsui annertuallaartut. Siunnersuutip uuma akiitsut annertusiartunnginnissaat kingunerissavaa, ineqarnermut akiliut innuttaasut aningaasaateqarfimmini aningaasaateqarneranni akiliutit nusunneqassammata, Justus Hansen allappoq.
Atuaruk: Angerlarsimaffeqanngitsut amerleriarujussuartut