D immikkoortitsisoqarsimanera pillugu nassuiaaqqusisoq

- Demokraatinut pingaaruteqarpoq nunami maani innuttaasut tamarmik assigiimmik pineqarnissaat aamma malittarisassat atuuttut naapertorlugit. Sualummik kulturitsinnut pingaaruteqarluinnartup, piniarnerup iluani.

- Ajoraluartumik akulikittumik tusartualerparput inuit immikkoortinneqarsimasutut misigisimasut, inuutissarsiutigalugu piniartunut pinialuttartunullu piniarnermut allagartamik tunniussisoqassatillugu.

Demokraatinit Inatsisartunut ilaasortaq Anda Uldum oqarpoq.

Demokraatinit inissaminiissorineqarpoq Naalakkersuisut nassuiateqarfigissagaat malittarisassat atuuttut taakkulu aqunneqarneri, qularnaarumallugu, innuttaasut assigiimmik sullinneqarnissaat aamma malittarisassat tamanut assigiimmik atortinneqarnissaat.

Piniarnermut allagartamik tunisisarneq pillugu Anda Uldum Naalakkersuisunut paragraf 37-mik apeqquteqarpoq:

• Naalakkersuisunut nassuiaqquneqarpoq inuutissarsiutigalugu piniartunut pinialuttartunullu piniarnermut allagartamik tunniussinermi suut tunngavigineqartarnersut ilanngullugit malittarisassanut tunngatillugu nunap immikkoortuini assigiinngitsuni malitarisassat assigiinngissuteqarnersut. Nassuiaammut aamma ilannguteqquneqarpoq naggataatigut kiap aalajangertarneraa piniarnermut allagartaq tunniunneqassanersoq tunniunneqassannginnersorluunniit.

• Qanoq iliorlutik Naalakkersuisut nakkutigisarpaat inuutissarsiutigalugu piniartunut pinialuttartunullu piniarnermut allagartamik tunniussinermi malittarisassat tamarmik malinneqarsimanersut?

• Naalakkersuisut ilisimasaqarfiginerlugu sulianut ingerlasunut atatillugu inuit qassit piniarnermut allagartamik qinnuteqarnerminni itigartinneqarsimanertik pissutigalugu naammagittaalliorsimanersut? Taamaassimappallu;

  a. suliat qassiunersut

  b. suliallu nunap immikkoortuinut qanoq agguarsimanersut?