aatsitassarsiorneq
D: Aleqap Tanbreez itigartippaa?
Naalakkersuisut Siulittaasuata Aleqa Hammondip Tanbreez Miningip piiaanissamut qinnuteqaataanut itigartinneqarsimanera Demokraatit ernumanartoqartippaat
Reutersip marlunngormat Kalaallit Nunaat pillugu nutaarsiassaq saqqummiussaa Demokraatinit qisuariarfigineqarpoq.
Demokraatit tunuliaqutaralugit Inatsisartunut ilaasortaq Anda Uldum paragraf-37 aqqutigalugu apeqquteqarpoq ilumut Naalakkersuisut Siulittaasuata Aleqa Hammondip Tanbreez Miningip piiaanissamut qinnuteqaataa itigartissimaneraa.
Anda Uldum ima apeqquteqarpoq:
- Ilumoorpa Killavaat Alannguanni aatsitassanik qaqutigoortunik piiaanissamut qinnuteqaat Naalakkersuisut itigartissimagaat? Taamaassimappat Naalakkersuisut qinnuigineqarput pissutaasut sukumiisumik nassuiaqqullugit.
Aleqa Hammondip apersorneqarnermini ima oqarpoq:
- Still, Greenland has rejected the first rare earths licence request from Tanbreez Mining, a unit of Australia's Rimbal Pty Ltd, on the grounds that it failed to meet all health and safety rules. A new application could be approved in the current government's term, which ends in 2017, Hammond said.
Oqaaseqarnera ima kalaallisuunngorlugu nutserneqarsinnaavoq:
- Kalaallit Nunaata Tanbreez Miningip aatsitassanik qaqutigoortunik piiaanissamut qinnuteqaataa itigartinneqarpoq. Piginneqatigiiffimmit allamit aqutaq Australia's Rimbal Pty Ltd-ip qinnuteqaammini peqqinnissamut isumannaallisaanermullu maleruaqqusat eqquutsissinnaanngimmassuk qinnuteqaataat itigiartinneqarpoq. Nutaamik qinnuteqaasiortoqarsinnaavoq Naalakkersuisunut issiasuusunut. Naalakkersuinerat 2017-imut killeqarpoq, Hammond oqarpoq.
Erseqqissaasoqarli
Aleqa Hammondip oqaatigisimasaanut Anda Uldum ima oqaaseqarpoq:
- Reutersip Naalakkersuisut Siulittaasuat eqqortumik paasisimappagu, taava Tanbreez Miningip Killavaat Alannguanni aatsitassanik qaqutigoortunik qinnuteqaataa itigartinneqarsimassaaq.
- Demokraatini neriuppugut itigartitsinermut itisuunik tunngavilersuutissaqartoq, neriuutigisimagaluaratsigu Killavaat Alannguanni aatsitassarsiorfiup Kalaallit Nunaata kujataani ineriartorneq pisariaqartinneqartoq ajunngitsup tungaanut kamissinnaassagaa.