D aamma Sul attuumassuteqanngitsumik peqquserluttarnermut akiuisunik kissaateqartoq
Immikkoortortamut suliarinnittussamut attuumassuteqanngitsumut inissinneqartussamik, nalunaarutiginninnernik suliaqartussanik siunnersuuteqarneq, Transparencyp tapersersorpaa,
Peqquserluttarnermut akiuniarneq nukittorsarneqassaaq. Ullumikkut Inatsisartuni siunnersuutit sisamat oqaluuserineqartussat tamanna anguniagaraat.
Peqquserlunnermut suliamut attuumassuteqanngitsumik immikkoortumik pilersitsisoqarnissaa, Steen Lyngep (D) siunnersuutigaa.
- Peqquserluttarneq pillugu suliniutit arlaannaannulluunniit attuumassuteqanngitsumi immikkoortortaqarfimmi katersorneqartariaqartut, immaqa aamma Namminersorlutik Oqartussani whistleblowerit pillugit aaqqissuussinermut atatillugu tigooraavittut atorneqarsinnaasumik, taassuma siunnersuutaani tamanna oqaatigineqarpoq.
Whistleblowerinit saaffiginnissutit ullumikkut Namminersorlutik Oqartussani Aningaasaqarnermut Sulisoqarnermullu Aqutsisqarfiup ataani suliarineqartarput, aningaasaqarnermut naalakkersuisoqarfiup ataaniittumi. Tassani suliap qanoq suliareqqinneqarnissaa aalajangiunneqartarpoq, aamma naalakkersuisoqarfimmi pisortaq akisussaasoq aqqutigalugu pissanersoq.
- Imaassinnaavoq arlalitsigut aaqqiissutissatsialaasinnaasoq tamakkiisuunanili eqqarsaatigalugu sulisut innuttaasullu aaqqissuussinermut tatiginninnissaat, Tillie Martinussen (Sul) siunnersuumminut tunngavilersuummi allappoq, taanna aamma attuumassuteqanngitsumik immikkoortumut siunertaqarpoq.
- Suliaq annertoorujussuaq
Isumassarsiarli Naalakkersuisunit tigulluarneqanngilaq, tamanna suliarujussuussasoq taakku isumaqarput, tassanilu aamma attuumassuteqanngitsumik pilersitsiniaraanni Danmark ilanngunneqartussaalluni.
- Allassimasutut taamaalilluni qulaajaanermik suliaqarneq annertoorujussuusussaavoq, nunatsinni taamatullu nunani allani oqartussat ilaatinneqartussaallutik, aammalu siunnersuuteqartup piffissaliussatut allassimasaata iluani naammassineqarsinnaanaviarani, aningaasaqarnermut naalakkersuisoq, Vittus Qujaukitsoq (NQ), akissuteqaammini allappoq.
Transparency International Greenland (TIG) illuanik tamanna isumassarsiatsialaasoq, isumaqarpoq.
- TIG-mit isumaqatigineqaqaaq taaneqartutut nalunaarutiginnissinnaanerit attuumassuteqanngitsunit isumagineqartarnissaat, TIG-mi siulittaasoq, Anita Hoffer, tusagassiuutinut nalunaarummi allappoq.
- Nunat allat qiviaraanni periuserineqarsinnaasut assigiinngisitaartuupput, kisianni TIG aamma isumaqarpoq, Kalaallit Nunaannut naleqqussagaasumik suleriusissamik pilersitsisoqarsinnaasariaqartoq. Tamakkulu pillugit TIG oqaloqataarusoqaaq.
Steen Lyngep siunnersuutaani qitiusut ilagaat, peqquserlunnermut akiunermut inatsisitaarnissaq misissorneqartariaqartoq. Tassanilu aamma Naalakkersuisut qiimmatsannerat takuneqarsinnaanngilaq, TIG isumaqarpoq, Kalaallit Nunaat FN-ip peqquserlunnermut malittarisassaanut iluaqutigalugu ilannguttoqarsinnaasoq.
- Tamatumunngalu atatillugu TIG-mit tikkuarumaneqarpoq, taamatut iliorsinnaanermi FN-imi peqquserlunnermut akiuinissamut atatillugu isumaqatigiissut sinaakkusiisussatutt atugassaqqissuummat. Minnerunngitsumik nunarsuaq tamakkerlugu isiginnittaatsimut, Steen Lyngep, Kalaallit Nunaata nunarsuup sinneranut ammaraluttuinnarneranik oqarneranut naleqquttuuvoq, Anita Hoffer isumaqarpoq,