Skip to main content

D: Aalisarneq pillugu sinnattuaqilluni takorluuinerit taamaatillik

Aalisarnermut inatsisissatut siunnersuut tunngavissaqarpianngitsoq, Niels Thomsen isumaqarpoq.

Aalisarnermut inatsisissamut siunnersuut – naatsorsuinernit ikitsunik aamma qularnartunik tunngaveqartoq, aalisarneq pillugu tv-kkut aallakaatinneqartumik oqallinnermi Niels Thomsenip (D) saqqummiuppaa. Maanna isummersuutini tusagassiiuutinut nalunaarummi itisilerpai.

Siunnersuut nutaaq inuussutissarsiortunit kattuffinniillu inassuteqaatinik tunngaveqarnissaa, taassuma kissaatigaa.

- Inassuteqaatigineqartut kingunerisassanik misissueqqissaarinernik kingunerisassanillu naatsorsuinernik tunngaveqassapput, taamaaliornikkut suliniutit assigiinngitsut aalisarnermut - minnerunngitsumillu inuiaqatigiinnut - qanoq sunniuteqarnissaat ersarissumik takutinneqarniassammat, taanna allappoq.

- Kingunerisassanik misissueqqissaarinerit periarfissanik arlalinnik tunngaveqassapput, arlaannaanulluunniit attuumanatik, tunngavilersorluagaallutik kiisalu iluaqutissat ajoqutissallu ersersinneqarlutik. Allaanerulaartumik oqaatigalugu, aalajangiinissamut tunngavilersorluakkamik tunngavissamik pilersitsisoqassaaq.

Aalisarneq matoorutitut

Nunatsinni inuussutissarsiutit pingaarnersaat naalakkersuinerup tungaanit peqqissaarunneqartariaqartoq, aamma aningaasanoorutigineqassanngitsoq, taassuma naqissuserpaa.

- Aalisarnermik suliffissuaqarneq niuernikkut ingerlatsinikkut qularnaatsunik atugassaqartinneqassaaq. Assersuutigalugu pisassiissutit tunniunneqartut utertinneqariartaannginnissaat qularnaveeqquserneqassaaq. Qularnaveeqquserneqanngippammi aningaaseriviit arlaalluunniit angallatinut nutaanut pitsaasunut aningaasaliinissamut taarsigassarsititsiumanavianngilaq.

- Aalisarnermik suliffissuaqarnerup ullumikkut qaffasissumik akileraarusersuiffigineqarlunilu akitsuusersuiffigineqarneratigut aningaasanut inatsimmi putunik matooraanermut aallerfissatut atorneqarnera partiillu saamerliusut agguaasseqqinnissamut politikkiannut atorneqarnera politikerit maanna issiasut inuussutissarsiuteqarnerup inuiaqatigiinnut tamanut iluaqutaasussamik qanoq ineriartortinneqarsinnaaneranik paasisimasaqanginnerannut takussutissaavoq.

IA iluareqqusaarneraraa

Siunnersuut saqqummiunneqartoq ‘agguaasseqqinnissamillu eqqarsartaatsimik sunnerneqarsimasoq’ taanna isumaqarpoq, tamatumunngalu taarsiullugu inuussutissarsiorneq nukittorsarneqartussaagaluartoq.

- Taamaammat alloriarneq siulleq tassaavoq nassuerutigissallugu aalisarnermik inuussutissarsiuteqarneq nunani tamalaani ingerlatalinnut angisuunut unammillernermat, taamaammallu unammillersinnaassuseqarnerup naammassisaqarsinnaassutsillu annertusarnissaat pineqarlutik.

- Maannakkut aaqqissuussaaneq aalajangiusimaannarlugu aalisarnermi nunarsuarmi siuttuunissamik sinnattuaqilluni takorluuinerit - kingullermik IA-p siulittaasuanit saqqummiunneqartut - iluareqqusaarneriinnaapput, qinersisartunik uukapaatitsinerullutik inuussutissarsiummillu, tassungalu ilanngullugu inuiaqatigiit aningaasaqarnerannik nalinginnaasumik paasisimasaqannginnermut ersiutaallutik.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER