assit takukkit
Costa del Nuuk Center
Arfininngormat unnukkut Nuuk Centerimi atisanik takutitsisoqarpoq, nipilersuut nipittorlugu, sikoqarluni atisarpassuilu torraasut takutinneqarlutik
Ukioq manna atisanik takutitsinersuaq illoqarfimmi atisaarniarfiit amerlanerpaat kattullutik aaqqissuussimavaat.
Ukioq manna sammineqarpoq beach party, taamaattumillu palmit bastillu atorneqarput, barimilu atisaqarpianngitsunik saqisoqarluni. Inuillu billetsisimasut 250-it missaanniittut atisarpassuarnik takutinneqarput, rappertartullu tusaamasat Nuuk Posse uninnganerup kinguninngua aliikkuersuipput.
Arnat kusanartut angutillu takuminartut
Scenemi takutitsisut qiimalluinnarput, atisallu nuannersut takutinneqartut assigiinngitsorpassuupput. Atisanik takutitsisut inuusuttuupput scenemilu takutitsinissartik aaqqissuulluarsimavaat.
Takkuttunut 50-inut siullernut isertarfimmi tikilluaqqussummik tunissutissannguaqarpoq, taamaattumillu matu nalunaaqutaq 19.00 ammarneqarmat kinguleriiaartoqarpoq.
Qiimallluarput
Scenemi takutitsisut immikkut takujuminartunik takutitsigaangata isiginnaartut qiimmattaalluartarput. Aamma qiimaneq taama annertutigaaq kalaallit rappertartut siulliit, Nuuk Posse, scenemut qaqimmata.
Nipilersoqatigiit nipilersukkanik pingasunik atuipput, human beatboximik break dancemillu qitittarlutik, nipilersoqatigiit pingasuusut inuusuppiarunnaareersimagaluarlutik.
Pisiniarfiit peqataasut
Atisanik takutitsinermi pisiniarfiit peqataasut tassaapput: Nønne, Ittu.net, Ittu Man, Ittu Woman, Pappi, Eskiman, Torrak Fashion aamma His & Hers.
Atisaarniarfiup Nønnep piginnittua Morten Nordahl atisanik takutitsinerup kingorna atisanik takutitsineq kusanartoq qiimalluartoqarneralu naammagisimaarluarini. Ukioq manna nutaatut Greenland Ice peqataavoq, taannalu aamma sikuliaminik nutaanik neqerooruteqarpoq
Asserpassuit ataani takukkit