kulturi
Copenhagen Art: Ammarnissaq sioqqullugu eqqumiitsuliat sisamat 66-iusunit tunineqartut
Kalaallit Nunaat ukiuni arfinilinni siullermeerluni eqqumiitsulianik saqqummersitsinermut Copenhagen Artimut peqataasitsilerpoq
Bella Centerip Københavnimiittup tallimanngornermi Art Copenhagenimut alakkaasussanut matut ammarpai, taanna Skandinaviami eqqumiitsulianik saqqummersitsinerit annersaraat.
2010-miilli siullermeerluni ukioq manna saqqummersitsinermi aatsaat kalaallinik peqataasoqaqqippoq.
Eqqumiitsulianik tunisaqajaartut
Alakkaasunut qaaqqusanut saqqummersitsivik ippassaq takutinneqarpoq, saqqummersitsivillu sulianik 66-inik imaqartoq soqutigineqarluarpoq. Ippassaq aaqqissuussinermi eqqumiitsuliat sisamat tunineqareerput.
Art Copanhagen ukiormanna minnerusumit Forumimit angisoorsuarmut Bella Centerimut Amagerimut nuunneqarpoq, ullumikkut Danmarkimi silagissorsuugaluartoq alakkaasut amerlanissaat naatsorsuutigineqarpoq.
Eqqumiitsuliortut qulit qujamasuttut Art Copenhagenimi eqqumiitsuliatik nunanit tamalaaneersunut amerlasuunut saqqummiunnissaannut periarfissaqarsimapput.
- Naammagisimaartorujussuuara. Bella Centerimi inissisimalernera aamma saqqummersitsivipput kusanartoq, Gukki Nuka oqarpoq, taanna saqqummersitsisut ilagaat.
Ataatsimoortoq
- Suliat inissinneqarnissaannut eqqarsarluarluni pilersaarusiortoqarsimasoq takuneqarsinnaavoq, peqataaneralu nuannaarutigisorujussuuara. Naak eqqumiitsuliortut qulit assigiinngitsuugaluarluta, suliagut imminnut ataqatigiipput, saqqummersitsinerlu ataatsimoortutut ippoq.
Saqqummersitsivik 52 kvadratmeterisut angissuseqartoq Københavnimi Kalaallit Illuutaannit katiterneqarpoq.
Eqqumiitsuliortunit Kalaallit Nunaannut attuumassuteqartunit qulinit saqqummersitsinermut tapiisoqarpoq: Naja Rosing-Asvid, Lisbeth Karline Poulsen, Ivan Burkal, Ivínguak´ Stork Høegh, Julia Pars, Buuti Pedersen, Sissi Møller, Kristine Spore Kreutzmann, Gukki Nuka aamma Lars Møller.
Atuaruk: Simon Lynge nutaamik musikvideomik saqqummersitsisoq
Uani weekendimi saqqummersitsinermi suliat ilagaat qalipakkat, suliat digitaliusut, assilissat, marraat, igalaaminernik eqqumiitsuliat kiisalu ilaatigut qissianik suliat aamma kalaallit atortussiaaat.