angerlarsimaffeqanngitsut
Containerit angerlarsimaffeqanngitsunut inisimmavigissavaat
Kommuneqarfik Sermersooq Nuummi containerinik 30-inik angerlarsimaffeqanngitsunut 26-inut inissaqartitsiniarluni pisivoq
Containerit ineeqqatut nerrivimmik allaffilerlugit, issiavilerlugit, siniffilerlugit aamma sikaavilerlugit aaqqissuunneqarsimasut, siunissami angerlarsimaffeqanngitsunit 26-init najugarineqalissapput.
Containerit nunatsinnut tulluarsakkamik oqorsagaapput, innaaallagissamillu kiassagaallutik.
Containerit pisiarineqartut Nuummi umiarsualiornermut atatillugu sulisunit manna inigineqarput.
Atuaruk: Angerlarsimaffeqanngitsut amerlavallaartut
Inuusuttut angerlarsimaffeqanngitsut
Inissianut innersuussinerit Kofoeds Skole, NO INI aamma Frelsens Hæri suleqatigalugit pissaaq. Inissiat ingammik inuusuttunut atugassiaanerupput.
- Inuusututtut Nuummi amerligaluttuinnartut angerlarsimaffeeruttarneri politikkip tungaatigut ernumanartutut isigaarput, borgmesteri Asii Chemnitz Narup (IA) oqarpoq.
Atuaruk: Nuummi angerlarsimaffeqanngitsunut unnuisarfik
- Taamaattumik isumaqarpugut inuusuttut angerlarsimaffeeruttartut ikiorneqarnissaat manna salliunneqartariaqartoq.
Containerit 30-t Kommuneqarfik Sermersuumit pisiarineqarput – taakkunannga 26-t inigineqarsinnaasutut atorneqassapput, sinnerilu sisamat ilaat perusuersartarfittut, uffarfittut ilaallu ataatsimoortarfittut atorneqassallutik.
Atuaruk: Angerlarsimaffeqanngitsut amerleriarujussuartut
Containerit 30-t pisiarineqarnerini Kommuneqarfik Sermersooq 2 millioner koruuninik akiliivoq. Aningaasat taakku saniatigut containerit inissaannut, suli maannamut sumiinnissaannik aalajangerneqanngitsumut, assartorneqarnissaat immikkut aningaasartuutaassaaq.