Clooney Bullockilu Nunatsinnut qaninniarput

Juaaka Lyberthip erinarsuusiaata saniatigut Hollywoodimi filmiliami ’Gravity’mi kalaallinik allanik peqataasoqarpoq. Orto Ignatiussen Tasiilameersoq aamma peqataavoq tusaamasat soorlu George Clooney aamma Sandra Bullock inuttaaqatigalugit.

Atuaruk: Juaaka goes to Hollywood

Filimi pineqarpoq silaannarsualiartartoq nunarsuarmiit 500 kilometerinik ungasitsigaluni ingerlariaqqinnaveersoq. Arnani pingaarnertut inuttaasup Sandra Bullockip radiokkut kalaaleq sikumi aalisartoq attavigileriasaarpaa.

Attavigisaatut inuttaavoq Ortu Ignatiussen filmimi Aningaamik ateqartinneqartoq. Taanna tuluttoorsinnaanngilaq Sandra Bullockilu filmimi silaannarsuarmi atortunik iluarsaassisartutut Dr. Ryan Stoneusaartinneqartoq kalaallisut oqalussinnaanani. Taamaakkaluartoq taakku qimmit, naalugiarsuit, inuuneq toqulu pillugit eqqartueqatigiittut, nittartagaq ’Rope of Silicon’ allappoq.

Juaakap Lyberthip sinnassaasiaa ’Sinigit meerannguaq’ filmi novemberimi takuteqqaarneqartussami atorneqarpoq.

Nunarput suli sammivaat

Marlunngornermi aamma saqqummerpoq Kalaallit Nunaat aamma issittoq qitiutillugit tv-mi nangeqattaartuliaq USA-mi TV-qarfissuup HBOp suliarissamaaleraa. Nangeqattaartuliaq ’Blood & Ice’mik taaguuteqassaaq.