aliikkusersuineq
Cirkus tikilerpoq
Cirkus Arena Nunatsinni angalaarnissaminut piareeqqippoq
Klovnit, angakkuartartoq minnerunngitsumillu eqaatsumik takutitsisartut Cirkus Arenap Nunatsinni illoqarfinni tallimani oktoberimi takutitsinissaani pingaarnertut aliikkusersuutigineqassapput.
Nunatsinni angalaarnerat oktoberip aallaqqaataani aallartissaaq Ilulissani takutitsisoqassammat tassanngaanniillu Aasiaat, Sisimiut, Maniitsoq Nuullu orninneqassapput.
Qallunaat cirkussiat taanna 1955-miilli aliikkusersuisartoq qallunaanik nunanillu allaneersunik aliikkusersuisartunik nassarniarpoq.
- Aliikkusersuinermi qallunaat nunanillu tamalaaneersut tusaamasat takutitsissapput cirkus ilisimaneqartoq malillugu quianartumik tupaallannartulimmillu pisoqarumaarluni, Cirkus Arena nalunaarpoq.
Nunatsinni aliikkusersuinerit nalunaaquttap akunnerinik marlunnik sivisussuseqartassapput.