Chemnitz Larsen: Eqqartuussiveqarneq pitsanngorsarneqassaaq

Eqqartuussissuserisut Siunnersuisoqatigiit Kalaallit Nunaanni inatsisitigut isumannaatsuuneq pillugu nalunaarusiartik saqqummiuppaat, tassani Nunatsinni inatsisitigut isumannaatsuuneq equngasoqartoq inerniliunneqarpoq, eqqartuussisut, unnerluussisut aamma illersuisut akornanni nunami eqqartuussiveqarfinni sisamaasunii pisinnaasaat amerlanertigut pitsaaneq ajorput.

IA-p Folketingimi tamanut ammasumik Kalaallit Nunaanni eqqartuussiveqarneq pillugu ukiumi nutaami tusarniaatitsiniarnissaq sulissutiginiarpaa. Tamanna Inatsisartut Anatsiseqarnermut Ataatsimiititaliaanik Naalakkersuisunillu qanimut suleqateqarluni pisariaqartoq, Folketingimut ilaasortaq Aaja Chemnitz Larsen isumaqarpoq.

Politikkikkut aallussineq annertusarlugu
- Tusarniaaneq politikkikkut tamatumunnga aallussinermut annertusaataasinnaavoq, Folketingimi Inatsisartunilu, taamatullu pitsanngorsaanernik qulakkeerinnilluni, Aaja Chemnitz Larsen erseqqissaavoq.

Taassuma illersuisut pitsaanerusumik ilinniagaqalersillugillu sulinermi atugarinnerulersinniarpai, suliaq saniatiguuginnaajunnaarniassammat.

Atuaruk: Eqqartuussissuserisut eqqartuussisoqarfiit misissoqqissaarpaat

Innersuussutit naleqquttut
- Eqqartuussisut piginnaasaat pitsanngorsarnissaat sulissutiginiarpara, suliaminnullu atatillugu ineriartornerat nukittorsarlugu.

- Maanna danskit naalakkersuisui, ingammik inatsisinik atortitsinermut ministeri aalajangiisussaassaaq, taanna innersuussutit pillugit oqaloqatiginiarpara, taamatullu eqqartuussiveqarnermut innersuussutit naleqquttut, Inuit Pisinnaatitaaffiinut Kalaallit Nunaata Siunnersuisoqatigiivisa nalunaarusiaanni kingullermeersut eqqaasitsissutiginiarpakka, Aaja Chemnitz Larsen oqarpoq.

Atuaruk: Kommunefogedit peqatigiiffiat: Nunaqarfiit anginerusut isertitsiviit pisariaqartippaat