peqqarniisaarniartoqareersoq
Charlie Hebdop Muhammedimik titartakkaminik saqqummiussissaaq
Quiasaarusianik titartakkanik saqqummiussisartut Charlie Hebdo saqqummersitseqqileruni assigiinngitsunik 16-nik oqaatsinik nutserneqarsimasunngorlugu saqqummiunneqassaaq - ilaatigut Muhammedimik titartakkat saqqummiunneqassapput
Sapaatip akunneranut saqqummiussisartut Charlie Hebdo ilaatigut Muhammedimik titartagalimmik ilanngussillutik saqqummiussissapput pingasunngorpat.
Tamanna aviisip eqqartuussissuserisuata Richard Malkap radioqarfimmut France Interimut uppernarsarpaa.
- Charlie Hebdo pingasunngorpat saqqummissaaq, soorunami Muhammedimik titartagaq ilaatinneqassaaq. Politikkerinik upperisanillu quiasaarutinik imaqarluni saqqummissaaq, Richard Malka France Interimut oqarpoq.
- 'Charlieuvunga' anersaaralugu mittatiginnittunik saqqummiussisoqassaaq, allat isumaat suutinnagit saqqummiunneqassalluni, nangilluni oqarpoq.
Aviisip sulisui qulit peqqarniisaarnianit toqunneqarput pingasunngormat. Parisimi ulluni tulliuttuni pingasuni aalassassimaarutigingaatsiarneqarpoq.
Aviisi saqqummeraangat 60.000-nngorlugu naqiterneqartarpoq. Pingasunngorpalli saqqummersinneqalerpat 1 millioninngorlugu saqqummiunneqassaaq. Aviisi saqqummiunneqaraangat 16-nik qupperneqartaraluartoq pingasunngorpat saqqummerpat arfineq pingasunik qupperneqassaaq. Saqqummersinneqarpat oqaatsinut 16-nut aamma nutserneqassaaq.
Franskit aviisiannit Liberationimit saqqummersinneqassaaq aviisimut peqqarniisaarniartoqareernerata kingorna. Charlie Hebdomi sulisut Liberationimiitinneqarallarput.
Parisimi peqqarniisaarniartoqarnerani inuit 17-t katillugit toqutaapput. Charlie Hebdomi sulisut aqqaneq marluk toqunneqartut.
Taakku saniatigut biilit angallannerannik nakkutiginnittoq ataaseq toqunneqarpoq kiisalu sallunaveequtitut tigusarineqartut sisamat aamma toqunneqarlutik.
Angutit pingasut peqqarniisaarniartut politiinit aallaaneqareernermi kingorna aamma toqupput.