peqqarniisaarniartoqareersoq
Charlie Hebdomi saqqaritinneqartut Nutaarsiassaqartitsivik Sermitsiaq.AG-mit saqqummiunneqassapput
Angut turbanilik ’Je suis Charlie’-mik allaqqasumik paarisalik quiasaarusianik saqqummiisartut aviisianni Charlie Hebdomi saqqaritinneqassaaq. Charlie Hebdomi saqqaritinneqartoq aamma siornatigut saqqaritinneqarsimasoq Nutaarsiassaqartitsivik Sermitsiaq.AG-mit saqqummiunneqassapput
Franskit quiasaarusiortartut aviisiat Charlie Hebdo pisiniarfinni pingasunngorpat pisiarineqarsinnaalerpat saqqaani angut turbanilik umikkaaq saqqaritinneqassaaq.
Aviisi Libération nalunaarpoq. Charlie Hebdomi suleqataasut aviisimi tassaniitinneqarallarput aviisimi suleqataasut aqqanillit sapaatip akunnerata siuliani peqqarniisaarnianit toqutaareersullu.
Aviisimi saqqaritinneqassaaq angut titartagaq turbanilik allagartamik 'Je suis Charlie'-mik paarisaqartoq. Oqaaseq taanna nunani assigiinngitsorpassuarni ulluni makkunani atugaavoq, killilersugaanani oqalussinnaanermut tunngassuteqarluni. Peqqarniisaarniartoqarnerani toqutaasunut aamma oqaaseq ataqqinninniutaavoq.
Qulequttami angutip titartakkap qullilinerata 'Tout Est Pardonné' oqariartuutigaa, tassa isumaqartinneqarluni 'pisut tamarmik isumakkeerfigineqarput'.
Angut titartagaq aviisimi saqqaaniitinneqartoq Muhammediunersoq ilisimaneqanngilaq, titartaasorli Luz siornatigut titartaasareerpoq Muhammediusaartitaminik.
Akiniaanerugunartoq
Islamistit aviisimut Charlie Hebdomut peqqarniisaarniarput, aviisip Muhammedimik siornatigut titartaasimaneranut akiniaataagunarluni.
Sapaatip akunneranut saqqummiussisartut Charlie Hebdo ilaatigut Muhammedimik titartagalimmik ilanngussillutik saqqummiussissapput pingasunngorpat.
Tamanna aviisip eqqartuussissuserisuata Richard Malkap radioqarfimmut France Interimut uppernarsarpaa.
- Charlie Hebdo pingasunngorpat saqqummissaaq, soorunami Muhammedimik titartagaq ilaatinneqassaaq. Politikkerinik upperisanillu quiasaarutinik imaqarluni saqqummissaaq, Richard Malka France Interimut oqarpoq.
Aviisi saqqummeraangat 60.000-nngorlugu naqiterneqartarpoq. Pingasunngorpalli saqqummersinneqalerpat 3 millioninngorlugu saqqummiunneqassaaq. Aviisi saqqummiunneqaraangat 16-nik qupperneqartaraluartoq pingasunngorpat saqqummerpat arfineq pingasunik qupperneqassaaq. Saqqummersinneqarpat oqaatsinut 16-nut aamma nutserneqassaaq.
Aviisip sulisui aqqaneq marluk peqqarniisaarnianit toqunneqarput pingasunngormat. Parisimi ulluni tulliuttuni pingasuni aalassassimaarutigingaatsiarneqarpoq.
Nunarput tapersersuisoq
Kalaallit Nunaanni aviisit sapaatip akunneranut saqqummertartut Atuagagdliutit aamma Sermitsiaq Charlie Hebdop aviisiani saqqaritinneqartut saqqummiunneqassapput, tassani titartakkat quianartuliat assigiinngitsut soorlu Jiisusi, Muhammed aamma Moses saqqummiunneqassapput.
Charlie Hebdop islamimuinnaq quiasaarusiortuunngitsoq saqqummersitsinermi ersersinniarneqarpoq, aviisilli takutinniarpaa upperisanut assigiinngitsunut pissaaneqartunullu aamma assigiinngitsunut isornartorsiuisuusoq takutinneqassalluni.
Parisimi peqqarniisaarniartoqarnerani inuit 17-t katillugit toqutaapput. Charlie Hebdomi sulisut aqqaneq marluk toqunneqartut.
Taakku saniatigut biilit angallannerannik nakkutiginnittoq ataaseq toqunneqarpoq kiisalu sallunaveequtitut tigusarineqartut sisamat aamma toqunneqarlutik.
Parisimi peqqarniisaarniartoqarnera pillugu Naalakkersuisut siulittaasuat Kim Kielsen, Siumut, oqaaseqarnermini pisut assuarai. Aamma Naalakkersuisut siunnerlugit Vittus Qujaukitsup Siumumeersup franskit Danmarkimi aallartitaannut misiginneqatigissummik tunniussivoq tallimanngormat.
Peqqarniisaarniat franskit illersornissamut sulisuinit toqunneqarput.
Atuagagdliutit pingasunngornermi saqqummertussaq naqiterneqartareersoq nittartakkami ullumi pisiarineqarsinnaalissaaq. Tassani Charlie Hebdomi titartaasartup Bob Katzenelsonip titartarsimasaa ilaatigut Atuagagdliutini saqqaritinneqassalluni. Aviisimi allaatigisami pingaarnermi killilersugaanani oqalussinnaatitaaneq pillugu aamma allattoqarpoq.