ny aktion
Champions League-mi unammineq Greenpeacep unitsippaa
Nunani tamalaani avatangiisinik illersuiniaqatigiiffik sumiiffinnut, Greenpeace-mut iserfigeqqusaanngitsunut iseqattaartuarpoq
Taamatut pisoqaqqippoq.
Greenpeace-mit akerliuniat ilimagineqanngitsumik takkupput imminnullu takutinniartutik allanik akornusersuillutik.
Pingasunngormat FC Bsel-ip aamma Schalke 04-p Champions League-mi unamminerat Greenpeace-p unitsippaa, Basel-imi St. Jakob-Park-ip qalianut qaqillutik Schalke-p aningaasaliisua pingaarneq Gazprom ´akerliuniarfigigamikku selskabip Issittumi akisussaassuseqanngitsumik uuliamik qillerinera pissutigalugu´.
Akerliniat arsaattarfissuup qalianit allagartarsuaq 27 x 4 meterinik angissusilik nivinngarpaat allagartalik ´Gazprom don´t foul the arctic´(Gazprom, Issittoq aserorternagu).
Tamanna pissutigalugu unammineq minutsialunnik unitsinneqarpoq.
Qallunaaq inuttaq Anne Mine Roer Jensen, maanna allat 29-t peqatigalugit Ruslandimi parnaarussaaqqasoq, Arctic Sunrise-mut ilaasimavoq, Gazprom-imut akerliuniarnermi. Arsaattarfissuarmi akerliuniarnermi piumasarineqarpoq parnaarussaaqqasut iperarneqassasut.
Atuaruk "Ruslandip akerliuniat imaani ujajaaniatut unnerluuppai"
– Gazprom Issittumi avatangiisit immeraatigineranni siuttuuvoq. Russit oqartussaasuisa selskabi illersorpaat, eqqissisimasumik akerliuniartunik naqisimatitsillutik. Gazprom-ip qillerivia pisoqaavoq manngertornillunilu, selskabilu silami sualuttumi qillerinissamut piareersimananilu uulia anialerpat saliisinnaassuseqanngilaq. Taamaattumik uuliamik qillerinerit unitsinneqartariaqarput, Greenpeace-mi akerliuniarnermut akisussaasoq Jon Burgwald oqarpoq.
– Uuliasiortut ullumikkut teknologi-mik peqanngillat Issittumi uuliaarluernermi uuliamik saliisinnaasumik, Gazprom-ilu piumasarineqartutut uuliaarluertoqarnissaanut pilersaaruteqanngilaq. 2011-mi peqqissaannginneq pissutigalugu Kolskaya-mi ajunaarnersuaqarpoq, tassani qillerivik kivimmat inuttallu 53-it ajunaarlutik, Jon Burgwald tusagssiorfinnut nalunaarutikkut tikkuaavoq.
Arsaattarfimmi akerliuniarnermi russut oqartussaasui piumaffigineqarput Arctic Sunrise-mi inuttat iperarneqassasut.
Marlunngormat allakkat taamatut piumasaqaatillit russit aallartitaqarfiinut tunniunneqartut 730.00-t anguvaat.