isumaliutersuut
CBS-imi lektori nunatsinni naalakkersuinermik avoqqaarinnittoq
CBS-imi lektorip Benedikte Brincherip Politikenimi isumaliutersuummi Kalaallit Nunaanni Namminersorluni Oqartussaaneq pikkorluffiunerarlugu politikkilersuussiviuallaarnerarlugulu sakkortuumik avoqqaaraa politikkikkullu aaqqissuussaaneq Pituffimmi isumaqatigiissummik annaasaqarnermut nammineq pisuunerarlugu
Benedikte Brincker, Copenhagen Business Schoolimi Department of Businessimi lektori, Politikenimi tallimanngornermi saqqummersumi isumaliutersuummi nunatsinni politikkikkut aqutsinermik sakkortuumik avoqqaarinnippoq.
Isornartorsiuinermini isertuaatsumi Naalakkersuisut ilaatigut pikkorluttuunerarlugillu politikkilersuussivallaarnerarpai.
Isornartorsiuinermini Pituffimmi sakkutooqarfimmi kiffartuussinissamut isumaqatigiissut annaaneqartoq aallaavigaa, isumaqarnerarlunilu tamanna Naalakkersuisut nalinginnasumik aqutsinerannut annilaajummernartumik takussutissaasoq.
Kalaallit Nunaanni naalakkersuinikkut ingerlatsinermi qanoq ajortigisumik ingerlatsisoqarneranik taakkartuinermini Benedikter Brinckerip unammilligassarpassuit Kalaallit Nunaanni naalakkersuisunit assigiinngitsunit suliniuteqarfissatut siunniunneqartarsimasut taakkartorpai.
Isornaatilippassuit
Ilinniagaqarsimassutsip appasinnera, atorfinni nuimasuni taarseraannerujussuaq, oqaatsinut politikki kiisalu kammalaatersorneq Kalaallit Nunaanni politikkikkut aaqqissuussaanerup assersutigalugu Pituffimmik suliamik misigisaqartarneranut pissutaaqataasutut maluginiarpai.
Kalaallit Nunaanni politikkikkut aqutsisunik isornartorsiuinermi sorpassuit tikippai ilaatigullu Pituffimmi sakkutooqarfimmi kiffartuussinissamut isumaqatigiissutip suliariumannittussarsiuunnissaanut malittarisassanik allanngortinneqarsimasunik Namminersorlutik Oqartussani sooq annerusumik eqqumaffiginnittoqarsimannginnera ilaatigut eqqumiigalugu.
- Allannguutit inuit ilaannit malunnavissumik ilisimaarineqarsimapput. Sooq qisuariaateqartoqanngilaq – aamma Amerikamiut Københavnimi aallartitaqarfiat suliariumannittussarsiuussinissaq qaammatinik qulinik sioqqullugu Namminersorlutik Oqartussanut Danmarkimilu Nunanut Allanut Ministereqarfimmut saaffiginnimmat?, isumaliutersuutimini aperaaq.
Isumaliutersuut tamaat Politikenip nittartagaani atuaruk