Eqqartuussineq
Carsten Frank Hansen pinngitsuutinneqarpoq
Odensep eqqartuussiviata aningaasaqarnermut nunamullu namminermut naalakkersuisoqarfimmi pisortaanerusimasoq peqquserlussimasutut unnerluutigineqarnera pinngitsuutippaa
Carsten Frank Hansen Danmarkimi politiinit peqquserlussimasutut unnerluunneqartoq Odensep eqqartuussiviani pinngitsuutinneqarpoq. Ulluni marlunni aningaasaqarnermut nunamullu namminermut naalakkersuisoqarfimmi pisortaanertut atorfeqareerluni tunuarpoq peqquserlussimasutut unnerluunneqarnini pissutigalugu.
Danske Andelskassers Banks fynske filial Odensemi Carsten Frank Hansenip inuussutissarsiornermut tunngasunik siunersuisarfimmi pisortatut atorfeqarsimanini unnerluunneqaatigaa, piginneqatigiiffiup X-ip 1,9 million koruuninik aningaasanik atornissamut qinnuteqaataanut akuersisimanera unnerluunneqarpoq.
Unnerluummi ilaatigut allaqqavoq Carsten Frank Hansen 335.000 koruuninik Amagerbankimut nuussisimasoq piginneqatigiiffimmut Y-mut. Aqaguani nammineq kontoanut aningaasat ilineqarput, aningaasaateqarfillu Danske Andelskassers Bank 335.000 koruuninik annaasaqarluni.
Odensep eqqartuussiviani eqqartuunneqarami pinngitsuutinneqarpoq.
Pinngitsuunerarluni oqareerpoq
Carsten Frank Hansen Fyens Stiftstidendemit apersorneqartilluni oqarpoq unnerluunneqarnini paasisinnaanagu.
Carsten Frank Hansen aviisimut ilaatigut ima oqareerpoq:
- Taamaasiortoqarnera quarsaarnarpoq paasisassaananilu. Unnerluussummi amerlasuunik allaqqasoqarpoq, amerlasuut paasisinnaanngilakka. Eqqartuussivimmi uanga uunga qanoq oqaasissaqarnerlunga saqqummiukkumaarpara, Carsten Frank Hansen Fyens Stiftstidendemut oqarpoq.